For di momento cu e casonan positivo di Covid-19 a cuminsa subi Gobierno tabata preocupa. Y tabata spera un decision manera esun tuma door di Kansas, cu ta bisa cu tur hende cu yega di Aruba mester bay den cuarentena.
Minister di Salubridad Publico Dangui Oduber a bisa cu un cantidad grandi di casonan positivo nobo ta afecta e imagen di cualkier pais, y turismo cu Aruba ta depende grandemente di dje. E mandatario ta sinti cu e apertura di frontera a bay pasobra e cantidad di bishitantenan positivo tabata masha poco mes. Pero ta keda un preocupacion ora cu tin hopi caso positivo. Y awendia cu social media, tur hende tin acceso na e datanan y por mira e cantidad di casonan na cada pais. “Na Merca tambe e noticia aki ta yega y e ta preocupa nos.”
Di otro banda Gobierno ta un poco contento pasobra e siman aki tabata un di e miho simannan desde cu Covid-19 a lanta cabes atrobe dia 4 di augustus, mirando un reduccion di casonan positivo y e porcentahe di positivo entre e casonan. “Mi ta kere cu denter di poco lo kita Aruba bek di e lista. Ta compronde cu ora un pais tin hopi caso, otronan tin cu cuida nan residentenan cu bolbe di biahe. Na Merca tambe tin hopi caso positivo.”
E mandatario ta contento di por a mantene frontera durante e ultimo lunanan. Y awor cu e situacion ta mehorando, Aruba lo bay ta hopi mas agresivo den mercadeo. Y mas cu temporada halto ta den cuminsa.
Aruba tin un di e protocolnan mas estricto di mundo, tin un seguro obligatorio pa e turistanan, tin testnan obligatorio cu mester ta aden pa bishitantenan for di ciudadnan di riesgo (net prome cu nan yega Aruba), y tin testnan obligatorio pa turistanan. En general e turistanan ta sinti nan mes contento cu tur e protocolnan local y ta hayando hopi comentario positivo.
No a haya comentario di ningun turista cu a bini Aruba y a keda contagia.
