Diabierna anochi lat e sistema moderno di radar cu Minister Andin Bikker a adkeri pa Cuerpo Policial Aruba a yuda pa intercepta un boto nabegando cu velocidad halto for di Venezuela pa Aruba. Polisnan a activa mesora y hunto cu demas departamentonan hudicial y di orden publico a sorprende e embarcacion cu a yega tera na San Nicolas. Ey a detene 8 persona cu a yega nos isla di forma ilegal y a haya bultonan di droga tambe abordo di e boto. “Mi ta masha orguyoso di e aparato hudicial cu tabata activo henter anochi pa garantisa siguridad na nos costanan”, di acuerdo cu Minister mr. Andin Bikker.
Mirando e situacion regional a haci esfuersonan enorme pa por introduci entre otro un radar y un helicopter pa nos Cuerpo Policial y modernisa nos leynan (AB 2018 no 70, AB 2019 no. 40 y AB 2020 no. 94). Asina a reenforsa nos frontera pa ta bon prepara pa si botonan clandestino yega, por detecta y detene personanan ilegal y retene nan te ora por deporta nan bek pa nan pais di origen.
E situacion cu cada ciuidadano di mundo ta pasando aden actualmente dor di e pandemia ta preocupante, pero aki nos no tin espacio pa mas hende riba nos isla, ja cu Aruba tin su propio retonan laboral, social, economico y awo tambe di Covid19, pa enfrenta. Yega Aruba den forma ilegal ta hinca e mesun personanan aki den un situacion mas dificil ainda, pasobra nan lo por keda reteni pa tempo largo ya cu e vuelonan pa pais bisiña Venezuela no ta regular manera antes.
Pa locual ta e radar mes, na juni 2019 Minister mr. Andin Bikker a firma e decreto pa adkeri un radar masha moderno mes for di e compania Sea Hawk di Noruega. E compania ta funda na aña 2000 y como tal tin 20 aña di experiencia den bende productonan masha moderno y eficiente cu specialmente autoridadnan rond mundo por uza den cuadro di nan trabou di patruya y detecta obhetonan riba lama. E diferencia di e radar aki y otronan ta cu e ta diseña specialmente pa por detecta obhetonan, den e caso aki boto, hopi chikito y hasta oil spill riba lama. No obstante lama bruto of mal tempo, e radar ta detecta e botonan toch. No solamente pa ora di detecta botonan treciendo hende, droga of arma ilegal pa nos isla, pero tambe por haci bon uzo di dje den esfuersonan pa busca botonan perdi riba lama. Y door cu ta lease e sistema, e compania Seahawk constantemente ta keda monitor y optimalisa e sistema na e circumstancianan di costa local.
“Busca un radar pa KPA ta mara na un vision, pa por garantisa mas siguridad na nos Pueblo. Cu adkisicion di un radar pa KPA, banda di esun di Kustwacht, ta haci cu nos tin mas wowo riba lama pa hunto nos combati trafico ilegal di hende, arma y droga. Ayera nos partnerdiensten, trahando uni cu un solo meta, a dal baho mundo un sla duro, obstaculisando entrada ilegal di hende y droga pa nos isla. Danki na tur esfuerso y dedicacion incansabel”, asina Minister mr. Andin Bikker a finalisa bisando.
