Korectie Instituut Aruba (KIA) tin casi dos aña sin director. Desde cu Rocco Tjon a bandona e funcion pa drenta politica, no a nombra un director nobo. Algun dia pasa Minister di Husticia, mr. Andin Bikker a anuncia cu pronto lo nombra un director nobo. Fuentenan den Gobierno mes ta sigura cu Gino Winklaar, Alto Inspector di Polis, actual Hefe di Districto di San Nicolas, ta e candidato miho prepara.
Informacion disponibel ta indica cu ya caba Gino Winklaar a pasa henter e proceso di reclutacion, cu a cuminsa desde luna di mei 2018. A dura casi 1 aña pa e proceso por a yega asina leu cu ta cla pa scoge un candidato. E fuente a sigura cu ya caba e nombracion ta manera un “done deal”. Solamente mester concretis’e den Conseho di Minister.
Cuerpo Policial Aruba of KIA?
Mientras cu Gino Wiklaar a solicita pa e puesto di Director di KIA aña pasa pero no a tende nada mas, el a solicita tambe e aña aki pa e puesto di Altocomisario di Cuerpo Policial Aruba. Consecuentemente ainda e no a tuma un decision final. E chens t’ey cu por scog’e tambe pa e funcion di Hefe di Polis. Kizas su curason ta bati mas pa Polis cu pa KIA, pero na KIA sigur Gobierno lo prefera pa Gino Winklaar bira e hefe nobo.
Mas candidato interesa pa dirigi KIA
Ta bon pa aclaria cu tin mas candidato cu a solicita pa e puesto di Director di KIA, entre otro ex Comisario di Polis na Aruba, Gerold Dompig. Te cu recien el a ocupa e funcion di Director di prizon na Boneiro pero Gobierno di Hulanda a opta pa no renoba su contract mas. Un otro candidato ta e actual Director interino na KIA, esta Sergio Quandt. Tambe ta papiando di Emiliano “Emi” Geerman, un ex Polis. E ultimo aki den pasado tabata director na KIA caba.
E siman aki decision lo “por” cay
Cu henter e desaroyo aki nifica cu pronto lo tin un nombracion pa kende lo dirigi KIA den e siguiente tempo, den cual un di e decisionnan mas crucial lo bira renobacion di e edificio actual of construccion di un prizon nobo. Probablemente diamars awo of mas tarda diabierna lo pasa e nombracion durante reunion di Conseho di Minister.
Tocante KIA
Korrectie Instituut Aruba, KIA, a muda pa su localidad na Santo di Patia na San Nicolas dia 22 di september 1990, pues 28 aña pasa. E prizon tin un populacion di un maximo di 200 detenido, parti den detencion preventivo, seccion di hende muhe y seccion di hubentud. Na KIA tin mas o menos 180 empleado trahando 24 ora pa dia pa garantisa siguridad y atende cu e presonan den cuadro di e periodo cu nan mester sinta nan castigo cu e meta pa coregi nan erornan y sali atrobe como miho ciudadanonan pa nos pais.
