Ya pa algun dia caba, a manda mensahenan pa director di Dr. Horacio Oduber Hospital, Ezzard Cilie, buscando su oido. No ta hayando reaccion. A manda mensahenan p’e, e no ta contesta.
Ta suficiente motibo pa mustra cu berdad tin un mal contento. Kier tende for di gerencia con nan ta bay atende cu e preocupacion cu ta reinando den hospital y no ta hayando reaccion di parti di gerencia di hospital.
Diamars, 26 di Maart, nan ta pafo. Gina Maduro, presidente di ABV tambe tabata hunto cu e trahadonan. E ta splica e trahadonan di e departamento di emergencia di hospital, unda cu pa basta tempo caba ta reina un situacion cu no ta agradabel pa e empleadonan na Hospital, unda cu e parti di agresion ultimo a aumenta drasticamente.
Agresion verbal te na agresion fisico, unda cu e trahadonan a bisa cu ta basta. Ta basta di wanta abuso verbal, abuso fisico, pashentnan cu ta yega y ta inscribi nan mes como pashent y cu ta bira despues agresor. Esaki e trahadonan no ta acepta mas.
Tur ta victima di e sistema cu tin eynan. E sistema na unda cu tin e prome liña cu ta dokter di cas, cu no ta funciona normal y tin tweede lijn cu ta e specialistanan tampoco no ta funciona normal. Door di e lista di espera unda cu e pashentnan unda cu bay, nan ta caba na e unico porta cu ta habri 24/7 cu yama hospital.
Esaki ta pone un presion enorme riba e team di emergencia, unda cu nan mes falta di trahado. Desde cu a bin mudamento pa e emergencia nobo, pa cuminsa nan mes trahadonan no ta wordo envolvi na e cambionan di e departamento nobo aki.
For di comienso AVB tabata contra di e balie habri. A manda diferente carta e tempo ey, a manda carta pa Raad van Bestuur, Raad van Toezicht, Bouwcommissie, minister e tempo ey, pero no a haya e oido y nan peticion no a wordo horna.
A purba toch cu balie habri y awo cu nan tin mas cu un aña y cuater luna cu nan ta den e parti nobo, awor aki si a bisa ta basta. Si wak den e periodo aki cuanto caso tabata tin di agresion fisico y agresion verbal, no por sigui permiti cu e balie aki ta keda habri.
Tambe a opta pa e siguridad, ta wak tambe cu di parti di hospital, e departamento di siguridad no ta den servicio di hospital, pero ta un compania priva cu ta bin traha eynan, cu ta cambia continuamente, unda cu ta boga pa basta aña caba, pa loke ta e parti di siguridad, ta den servicio di hospital, unda cu por duna nan e entrenamento y ekipo pa nan por traha miho na un post cu yama SEH.
SEH ta un post hopi importante. Eynan agresion ta haltisimo, na unda cu mester pone hendenan capacita tambe pa e parti siguridad. Esey ta loke ta boga pe. Ta boga pa mas personal tambe. Pa expansion di e edificio nobo aki, a conoce un aumento di cambernan. Si tin cu compara e departamento bieu, tabata tin un capacidad di 7 cama y na e departamento nobo tin un capacidad awor aki di 7 onderzoek kamber, 2 spoedkamer, 3 verstrek y 1 issolatie cu ta bira un total di 13 camber, unda cu e aumento di expansion di tanto empleado, unda cu falta 4 enfermero specialisa y 4 dokter specialisa.
Esey ta pone cu apesar cu no tabata tin e aumento, e expansion den FTA, toch a bin den e edificio nobo y ta haci uzo di e cambernan aki y e demanda ta altisimo, tin hopi hende grandi na cas, cu continuamente ta bay SEH. Tin tambe e poblacion di imigrante cu a bin, tin turistanan cu ta bin, cual ta nos pilar, unda cu nan no tin un dokter di cas aki, ta yega na SEH. Tambe tin e poblacion di turistanan crucero cu ta yega eynan pa evaluacion pa sigui cu e trip. E presion ta enorme y sin conta e masa tur dia di pashentnan cu ta bin riba nan mes eynan, pasobra no por haya nan dokter di cas of no tin auto. Pero pa ki problema cu tin, nan ta yega SEH. Emergencia no ta un emergencia, sino mas bien e ta un huisartsenpost caro. Ora cu bin casonan di emergencia mes, ta eynan cos a cuminsa conta. Abo cu no ta un emergencia, of bin un accidente of un pashent cu atake di curason, e tin prioridad. Pashentnan cu no ta pa caso di emergencia, nan ta bin cu problema, pasobra nan tin cu warda hopi, pasobra e emergencia di prioridad. Eynan ta e problema.
Desde ki tempo
E trahadonan tin basta aña caba ta vocifera nan preocupacion. Un biaha pa luna, ABV tin un regulier overleg cu Raad van Bestuur. Tur luna esaki ta un di e puntonan di agenda. E parti di siguridad, e parti di mas personal, e parti di e werkflow cu ta haltisimo. A trece dilanti na varios ocasion. Na Raad van Toezicht a manda carta, pero logicamente for di 2014 tin uno cu ta sinta, cuater aña ciego, sordo y mudo pa e sindicato. Door di e situacion na November, a sinta cu nan y a cera conoci cu nan. Nunca a haya oido di nan. Di parti di e sindicato, nan a cana nan caminda, a manda diferente carta, a vocifera nan mes na diferente ocasion. Awor aki si ta basta, segun Gina Maduro.
Contacto cu director
Segun Maduro, desde e situacion cu a reina ora cu e director financiero, Theo de Kool a wordo manda cas cu pago, e miembronan a puntra cuanto a pag’e pa bay cas. Desde e periodo ey tambe, unda Ezzard Cilie a keda como unico lid di Raad van Bestuur. Hunto cu Raad van Toezicht y mediador di gobierno, a purba di haya partidonan na mesa pa purba firma un documento di acuerdo, pa haya un paz laboral, mirando cu tin cu continua cu un contracto colectivo. No a yega asina leu pa firma e documento aki. E CAO a continua. E director mes no ta forma parti di e CAO team. Esey ta pone cu e diamarsnan ta sinta pa CAO. Desde comienso di e aña aki, te awo, ningun regulier overleg no a tuma luga. Si tin un contacto cu e director, esey no ta asina.
Sindicato ABV ta uno responsabel. SEH ta un departamento hopi responsabel. Minister ta na altura, hospital ta na altura di e protesta. E persona cu a keda encarga cu maneho di hospital, e director a bay cu vakantie, apesar di tur e situacion aki, pa casi un luna largo. Awor aki, na luga tin dr. Casseres cu ta keda pa e parti medico y operacional, sosteni pa e management team. Pa ABV ta haya cu esaki ta iresponsabel cu e director ta coy su caminda bay pa casi un luna largo, lagando e situacion asina aki.
A splica minister dialuna atardi di e situacion y e minister a papia tambe cu dr. Casseres y dr. Daryanani. Pa 11’or nan lo tin nan prome encuento pa asina adresa e puntonan aki, segun Gina Maduro.
Esaki tabata un walkout di dos ora, na un manera responsabel, pasobra e departamento no ta bashi. Tin empleado na servicio. E servicio ta continua. Ta dunando servicio, solamente pa prome biaha a yega tempo cu e trahadonan tambe por sali pafo expresa nan mes, riba e violencia, vooral e agresion cu ta tumando luga, ta aumentando. Nan tambe tin derecho di expresa nan mes. Nan ta den servicio pa duna cuido, pero no pa haya maltrato, ni verbal y menos fisico.
