E luna aki “Ginger” tin un proyecto nobo, titula “Zaddy”. Ta trata aki di un cancion cu e meta pa hende papia riba cosnan cu nan no kier papia of mas bien manera ta bisa e topico “taboo”. Locual a insipir’e p’e cantica ‘ki segun su mes palabra ta “e cuarentena y e hombernan”. E cantica aki no ta pa un Zaddy so, pero pa hopi. Ginger su gana pa canta a bin door cu e semper tabata den e mundo di arte por ehempel modela, poesia y baile.
Ginger a menciona cu e comentarionan entre e publico ta manera un “rollercoaster” mirando cu no tur hende ta gusta. El a yega di haya menasa pa motibo di su preferencia sexual, pero esaki no a stop e di sigui cu locual e kier logra.
Ginger a menciona na nos cu ta importante pa semper duna respet. Nos ta den un generacion nobo cu ta creciendo y tin otro pensamento. Ginger a keda sorprendi di e impacto despues di e cancion “Ken kier Ginger Tea”. E ta gradici tur persona cu ta apoy’e, entre nan e generacion di mas grandi.
Kico ta motiv’e?
Ginger su motivacion ta su mama, pasobra e semper a bis’e p’e keda su mes y no tene berguensa di ken e ta. A pesar cu na cuminsamento su mama no a acepta su orientacion sexual, awo e ta e persona cu mas ta motiv’e den tur sentido di palabra. Su mama ta keda su inspiracion. P’e ta importante pa demostra na su mama cu el a lanta un yiu cu kier cambia mentilidad di e generacion ‘ki.
Zaddy
Den palabra di Ginger, Zaddy ta un “produccion hopi grandi”. Esaki ta un produccion di Ginger hunto cu su amigo Shark. Su desicion tabata semper pa traha cu calidad. A produci e videoclip di Zaddy durante cuarentena. Zaddy ta un hende homber cu bon tipo y cu ta masha atractivo mes. E ta un palabra relativamente nobo, uza specialmente pa hobennan pa yama un hende homber interesante. De bes di yam’e Daddy nan ta yam’e Zaddy.
Su mensahe
“No worry cu e bullies, sa bo balor. Semper tin amor propio”. El a menciona cu semper lo encontra hopi obstaculo. Un tempo el a sinti cu e no lo logra, pero a realisa cu ora tin amor propio lo yega hopi leu.
Ken ta Ginger?
Miguel Thielman, un hoben naci na 1992, pues di apenas 28 di aña di edad. Un persona di Dakota pero cu a lanta na San Nicolas. E tin un pasion pa musica, baile, modelahe y poesia. Algun tempo atras el a participa na Aruba Model Search. Su prome exito tabata “Den bo soño” sigui pa e tan gusta “Ken kier Ginger Tea?”, “Suta” y “Awe nochi”. Ginger a haya varios reconocemento manera:
Artista di aña
Rookie di aña
Skempi Awards y tambe a logra traha cu varios compania grandi na Aruba
