Dos turista Mericano a yega Aruba, a haci test na aeropuerto y por lo menos un di nan a test positivo. A instrui nan pa bay den isolacion obligatorio, precisamente pa evita cu ta contagia hende inocente riba caya. Sinembargo a opta pa no respeta e ordo di DVG y a sali bay keiro awe.
Nan a huur un auto y a bay haci compras tur rond, drenta supermercado y cumpra caha di comestibles pa nan pasa nan isolacion “na smaak”. Nan lo a pensa cu DVG no ta controla nan toch y a tum’un chens pa sali di e luga unda ta hospedando.
DVG a bay bishita nan awe y a confronta cu nan a sali. A avisa polis mesora pa activa patruyanan riba caya pa check e v-wagen specifico aki riba caya.
Rond di 1:00pm, un patruya di polis a topa e auto riba L.G. Smith Boulevard yegando CITGO Boulevard. A duna e chauffeur instruccion pa para y a baha nan for di caminda den e parkeerplaats di e stacion di gasolin. A informa DVG di unda a topa cu e auto.
A spacha un tourbus special cu ta traha cu DVG, pa bin busca e dos turistanan pa hiba nan na e centro di estadia pa turistanan contagia cu e virus. A yuda e hombernan pa pasa tur nan comestibelnan di nan auto pa e bus.
Polis a splica e turistanan e consecuencia si bolbe topa cu nan riba caya. Esaki awendia a bira un crimen, door di no respeta e ordo di isolacion, den cuadro di salubridad publico. A laga e auto para den e parkeerplaats y a hiba e turistanan pa isolacion.
Asina por mira con facil ta pa contagia cu e virus. Un turista asina, sabiendo cu e ta contagia, a drenta supermercado manera nad’un pasa y haci compras na grandi, cu tur consecuencia cu esaki por tin pa e trahadonan di e supermercado y tur e clientenan haciendo compras eyden. DVG awor lo mester conduci un check pa verifica si nan por a contagia otro hende durante e keiromento aki.
