Luna Foundation cu ta sali na vanguardia di cachonan, a keda traha normal durante e crisis aki di COVID-19 cu a bati na porta di Aruba. Luna Foundation ta percura pa un “Save Haven” pa cachonan cu personanan ta laga riba caya.
Actualmente nan tin 56 cacho cu nan ta cuida, pero nan capacidad ta yega 60. Segun Zoraida Conijn, e fundacion ta traha cu autoridadnan na momento cu nan ricibi keho por ehempel di bisiña, cu tin cacho maltrata, flaco of den mal estado. Of tin biaha hasta pasobra no ta duna nan awa of cuminda.
Sra. Conijn a splica cu den casonan asina, nan ta bay na e sitio cu Polis y ta trata di brinda ayudo, entre otro pa splica con pa cuida un cacho. Sinembargo si e doño no kier coopera, ta kita e animal for di dje. Tambe nan tin cachonan cu nan ta recoge di caya cu tin sarna. Ta peligroso pa e cachonan malo asina ta riba caya, pasobra tin dos tipo di sarna. Un ta pega hende y e otro no.
No ta tur cacho ta keda pa semper eynan. Tin biaha ta busca doño pa nan. Aworaki nan tin un cacho masha bunita cu tin 8 luna cu nan. Asina cu pone su potret riba Facebook tur hende ta bira loco cu ne. Lamentablemente a maltrat’e asina hopi cu el a keda cu miedo. Asina cu un hende bin wak’e, e ta bay sconde te patras aya den e cas. E no ta confia hende straño.
Loke a ripara ultimo tempo ta cu hopi hende ta simplemente tira nan cacho riba caya. Tin un comision di Covid-Team cu tin biaha ta topa e bestianan riba caya y ta avisa e fundacion. E ta pidi pa no laga e cachonan riba caya. E fundacion Luna tin un Facebook via cual por contact nan pa ora cu mester di ayudo cu un cacho. Pero tambe tin diferente otro fundacionnan cu ta traha riba e tereno aki.
