Nos a habri siman ku un tremendo notisia den kual un deportista yu di Kòrsou Roelly Winklaar mihó konosí komo Samurai a sali na di tres lugá den un kompetensia internashonal di Bodybuilding ku yama Mister Olympia ayanan na Merka (Las Vegas).
Aparte di a Sali den e tres mihónan di mundu Roelly Winklaar a logra konkista kurason di e públiko ku tabata presente na e evento di mr Olympia i pa medio di votashon a keda skohé komo nan faborito pa di e manera ei e gana tambe e título di The People Champion. Parlamentario Wimbert Hato na nòmber di frakshon di MAN den parlamento di Kòrsou ta uni su mes na tur e bon deseonan i ta felisitá sr Winklaar ku e logro aki. Un tremendo deportista i bon embahador pa nos pais.
