E spirito di flohera ta draai rond tur caminda, tumbando esun cu e topa den su caminda, pasobra flohera ta pica, ningun clase di flohera sea fisico of spiritual no ta obra pa bienestar di hende.
Un hende cu ta floho lo no progresa , pasobra e mes ta stroba, su mes, e ta haya un bon trabao, pero pa motibo di flohera, di no kier lanta mainta tempran e ta perde e trabao, despues e ta haya trabao di warda, tampoco lo ta na su agrado, pasobra e spirito di flohera cu ta den su mente, no ta permitie traha.
E spirito di flohera ta locual ta pone hende pensa cu nan por drumi henter dia y placa lo cay for di cielo pa nan, esey ta hende cu no tin proposito den bida, cu no tin un vision pa crecemento, y cu semper lo keda biba criticando otronan cu ta lucha pa bay dilanti.
Alma di hende floho ta antoha y no ta haya nada,ma alma di hende balente ta keda satisfecho (Proverbionan 13:4).
Den tur trabao tin ganashi, ma djis papia cu boca so ta conduci na pobresa (Proverbionan 14:23).
Door di flohedad span ta sak, y door di negligencia cas ta lek (Eclesiastes 10:18).
Deseo di e floho ta mat’e, pasobra su mannan ta nenga di traha (Proverbionan 21:25).
Un hende floho ta blokia tur manera cu e por haya trabao, pasobra cu su boca e ta papia contra trabao, e ta lubida locual ta para skirbi den Jeremias 29:11: Pasobra mi sa e plannan cu mi tin pa boso, Señor ta declara: plan nan pa pas y no pa calamidad, pa duna boso un futuro y un speransa. Flohera no ta inclui den e plan di Dios.
Un floho kier yega riba su prome dia di trabao mainta y bira supervisor atardi , pero despues di tur esey e no kier carga responsabilidad, e kier solamente placa y titulo, por ehempel e no kier e yabi di e compania, pasobra esey ta oblig’e di ta tempran tur dia.
E floho spiritual ta un otro capitulo extremo, pasobra e no kier sirbi Dios, e no kier tuma tempo den oracion, ayuno ni tampoco lesa e Palabra di Dios. E no ta interesa pa congrega, e no ta yega servicio na ora, asina cu e mira ta bira merdia e ta cuminsa wak su oloshi, pasobra e ta corda riba su barica so.
Hende floho spiritual no kier persevera den oracion, ni tampoco intercesion, nan no ta tuma encargo di cadena di oracion, pasobra nan no kier pone tempo pa Señor, pero si nan kier pa tur ora Señor tene misericordia di nan y yuda nan.
Esun cu ta traha cu man negligente, ta bira pober,ma man di balente ta haci rico (Proverbionan 10:4).
Flohedad ta pone hende cay den soño profundo, y un hende cu sinta pornada,lo sufri hamber (Proverbionan 19:15).
Flohera y envidia ta cana hunto, y orguyo tambe ta haci hende floho, hende floho ta desea cos di otro sin kier traha pe, pasobra e spirito di flohera ta haci hende bobo.
Tur loke boso haci, haci boso trabao di curason. Como pa Señor y no pa hende,sabiendo cu ta for di Señor, boso ta ricibi e recompensa di e herencia (Colosensenan 3:23-24).
Ningun trabao ta bon pa un hende floho, semper e tin keha, reclamo y mas cu tur cos e ta murmura y rebeldia.
Flohera no ta di Dios, e ta un simia sembra door di e diabel, pa stroba hende di crece den boluntad di Dios.
Sinceramente,
Pastoor Marcel Balootje.
