Diabierna atardi Minister di Turismo y Salud Publico, Dangui Oduber, a atende un evento ameno y exclusivo den Parke Nacional Arikok pa e pre-lansamento di “Blue Lizard Effect.” Un documentario fascinante produci entre e paisahenan magico di Aruba.
Aruba semper tabata hopi precioso den Caribe, renombra pa su playanan, naturalesa, aire fresco y su hendenan caluroso. E serie documental aki lo bay mustra e 4 elementonan cu ta aire, candela, awa y tera cu nos isla excepcional ta ofrece na nos localnan y bishitantenan. Traves di e cinematografia impactante lo conta e historianan impresionante cu lo transporta tur persona ariba un biahe unico. Invitando nos bishitantenan pa explora tur loke nos isla ta ofrece y pa nan por experiencia e magia cu ta haci Aruba un destino unico.
Como Minister di Turismo, e ta un orguyo pa experiencia un produccion di un nivel halto cu ta promove Aruba como un destino bunita y cu hopi hospitalidad. Esaki sigur lo hunga un papel importante pa eleva nos isla na nivel mundial. Minister Dangui Oduber su enfoke y compromiso ta na e practicanan di turismo sostenibel cu lo conserva e bunita naturalesa di nos isla pa e generacionnan binidero.
Pa finalisa, Minister Dangui Oduber ta felicita sigur ful e team di ATA pa nan dedicacion y compromiso pa promove Aruba como e destinacion di “Un Isla Feliz”. Ta di admira tur persona tras di e produccion y tur persona cu tabata envolvi pa haci e documentario aki un realidad. Tambe tabata un honor pa por a conoce y combersa un rato cu e artista internacional Jason Silva. E prome streaming lo inicia entrante 17 di april na Warner Channel, TNT, Discovery y MAX.
Laga nos sigui traha hunto pa sigura cu Aruba keda un isla bunita, sostenibel y cu servicio excepcional pa tur cu bin bishita. Aruba semper lo keda hopi precioso den Caribe.
