Recientemente nos a toca e tema di incentivo fiscal como manera pa gobierno yuda den loke ta e parti di stimula actividad economico den Caya Betico Croes, unda cu e mandatario a laga sa cu nan ta explorando esaki y pa basta tempo e proposicion a keda entrega na Departamento di Impuesto (DIMP), cu na su turno ta bisa di sostene esaki tanten ley no ta discriminatorio.
Na Corsou por ehempel, e asunto ta poco otro. Tin hopi desaroyo recientemente andando den nan centro di ciudad unda cu tin diferente construccion y proyecto andando. Ruisandro Cijntje, Minister di Desaroyo Economico ta bisa cu di berdad tin hopi movecion, turismo ta creciendo na Corsou cual ta trece cu relativamente bo ta mira locual ta sali di dje manera negoshi den horeca y mas den construccion of remodelacion. Esey bo ta mira bek tambe den e pronostico di cifra di Banco Central cual ta indica cu Corsou su economia pa 2024 lo tin crecemento di 4.8% cu e trend cu e ta bayendo.
Gobierno ta remodelando hopi edificio bieu tambe. Plaza Rondo ta cay bao responsabilidad di Cijntje, kende ta splica cu nan ta renobando e pa haci e plasa uno mas atractivo y asina bo ta yuda hisa henter e nivel den area di Punda y mas. Tin hopi inversionista cu ta biniendo Corsou mirando e potencial, treciendo cu ne tambe hopi mas desaroyo den henter area di Punda y vecindario.
E parti di Tax Holiday ta den e sistema di Corsou dependiendo e inversion. Banda di esey tambe e empresarionan chikito gobierno ta duna incentivo pa drenta den e negoshi y participa den henter e crecemento turistico. Tin diferente tipo di incentivo pero segun Cijntje ora bo ta papia di construccionnan grandi, inversionnan grandi, tambe tin esey pa tanto local y inversionistanan di exterior.
Den e parti di desaroyo di condominio den centro di ciudad, nos a puntra minister Cijntje con nan ta tene cuenta cu e parti di vivienda social. Hopi biaha bo ta purba atrae esaki pero e tematica ta bira tiki compleho dus ta curioso pa sa si tin maneranan of mecanismo via incentivo fiscal cu toch por duna miho prijs pa local. Hopi edificio den Punda ta den man priva tambe mescos por ehempel aki na Caya Betico Croes. Cijnte ta splica cu antes e partinan abao tabata hopi destina pa tienda y ariba pa magazijn, aworaki ta duna incentiva, den negociacion cu impuesto tambe cual ta cay bao minister di finansa – den proceso tambe riba cua incentivo por bini pa crea mas vivienda.
“Esey ta bay tin plan pa vivienda social, pero bo ta concentra mucho mas riba studiante of hendenan cu ta biba den temporada corto.” Den centro di ciudad, e bida di famia hopi biaha no ta duna pa motibo di e drukte cu tin. Pero toch wel bo ta haya un pareha of un hende cu t’ey pa periodo corto por biba den centro di ciudad, of hende di exterior tambe. Aworaki ta desaroyando e parti di vivienda mastanto pa asina bo centro di ciudad haya mucho mas bida tambe. Tin varios incentivo fiscal cu minister Cijntje no por a menciona tur for di su cabes pero ta afirma cu su coleganan ta trahando riba esaki pa haci e mucho mas atractivo pa haya mas hende den centro di ciudad.
