Dia 22 di mei awo corte lo anuncia su decision den e caso entama door di Fundacion Parke Nacional Aruba, hunto cu diferente NGO contra gobierno y JOB Holding (Isla di Oro). Nan no kier pa prolonga e permiso di erfpacht di Isla di Oro.
Anteriormente a para e caso aki pasobra e hurista di gobierno Vivian Emerencia, den nomber di gobierno, a wraak e hues. Cu e intencion pa kit’e for di e caso, pero e no a duna resultado ya cu a rechasa e peticion.
Dialuna mainta ora cu tratamento di e caso a sigui, tabata falta solamente e di dos ronda di parti di Isla di Oro. Su abogado ta mr. Anthony Ruiz y a haya dato importante pa mustra cu su cliente no ta destrui medio ambiente pero semper a traha pa protege flora y fauna di Aruba.
A entrega na corte un documento di loke ta e esencia di e trabou di JOB Holding, nan pensamento pa cu Isla di Oro y hopi mas. Den e documento por lesa cu a inaugura Isla di Oro na maart, 1965 cu a bira masha popular te den añanan 80. A haci intento pa trece cambio despues pero no a logra.
Aki tabatin plan un tempo pa e Zoetry Project cu finalmente nunca a concretisa. E tabata un eco-friendly resort, segun e descripcion duna. Tur NGO consulta, cu excepcion, a bisa cu si ehecuta esaki corectamente e lo tin un potencia grandi como un berdadero eco-resort y un ehempel den e region. Y Aruba Bird Life Conservation a comenta e tempo ey: “If intentions are good, this project could become an Eco-example for the region and beyond and may bring recognition for Aruba.”
E proyecto original di eynan tabata pa 30 bungalow riba awa, pero cual no tabata rendabel y lo mester a construi 30 mas. Ey ta caminda cu e tono di NGO-nan a cuminsa cambia.
Doño di Isla di Oro un biaha mas a enfatisa cu e idea no ta pa construi un hotel pero restaura e boto den tur su gloria di antes. El a duna e ehempel di con nan a planta mangrove unda Aruba Ocean Villas ta situa, dunando bida na esaki y ta mesun cos nan tin pensa pa haci na Isla di Oro, restaura e bida marino. Investigacion cu el a laga haci ta mustra cu di 1986 pa 2010 Aruba a perde 70% di su mangrovenan, entre otro na Isla di Oro y cu e perdida aki ta bay pa Saliña Cerca, Bubali Plas, Surfside , Zeewij, Mangel Halto, Spaans Lagoen, Santo Largo, Savaneta te Baby Beach. Y tur tin di haber cu actividadnan na tera.
A splica cu FPNA no ta haci nada pa restaura mangrovenan y na Aruba Ocean Villas nan maneho a trece bida nobo.
Den e estudio cu nan a haci, ta menciona tambe cu e destruccion mas grandi haci door di e ser humano na Isla di Oro a sosode entre 2018 pa 2019 ora cu doño di un cas a construi un pier priva via di e mangrovenan na Isla di Oro. Y te dia di awe ni FPNA ni otronan a pone e persona aki responsabel pa e daño causa, segun Osyth Henriquez a skirbi den su informe.
El a keda enfatisa durante henter tratamento di e caso cu no ta mira realmente cu FPNA a haci algo pa protege e mangrove. Nunca a hiba doño di e cas cu a causa daño na mangrove dilanti mesa berde.
Pero tambe tin cobamento formal rond riba tereno di FPNA pa añanan largo pa construi caminda. Na 2016 FPNA a permiti un helicopter baha dilanti cueba Guadirikiri, den e parke, un area unda cu bida salvahe y particularmente vleermuisnan ta biba y ta sensitivo pa desordo causa pa actividadnan. A haci esaki pa promove FPNA riba un canal di TV na Suecia.
Hunto cu e articulo tin agrega un documento skirbi pa Osyth Henriquez.
Pa un relato amplio lesa TREMPAN.
