Siman a habri cu un presentacion na Parlamento di Aruba encuanto esfuersonan andando pa stimula e desaroyo di agricultura comercial na Aruba como un pilar economico nobo. Minister di Asuntonan Economico, Comunicacion y Desaroyo Sostenibel, Geoffrey Wever, a elabora riba diferente proyecto cu enfoke riba desaroya agricultura comercial, e retonan y con ta trahando pro-activamente pa resolve “bottlenecks” cu ta den alcance di su Ministerio di Asuntonan Economico.
Reconociendo e desafionan cu agricultornan local ta enfrentando — costo halto di awa y coriente, disponibilidad di tereno, conocemento tecnico y empresarial, y acceso limita na financiamento pa proyectonan agricola — Minister Wever a detaya e pasonan concreto cu su ministerio a tuma pa mitiga e obstaculonan aki y fomenta crecemento di e sector, hunto cu e pasonan cu Minister Arends, como minister di sector primario ta implementando.
Destacando e iniciativanan strategico di e ministerio, Minister Wever a introduci Agri-Business Academy y Agri-Fund, den colaboracion cu Minister Arends y instancia financiero di credito, Qredits Aruba.
Agri-Business Academy
Un proyecto cu ta dirigi pa aumenta e habilidadnan empresarial di agricultornan, e academia aki a ser introduci na comienso di 2023, y ta provee entrenamento esencial y apoyo pa sigura cu e agricultornan di Aruba ta ekipa pa maneha y crece nan negoshi agricola efectivamente. E aña aki lo organisa e Agri-Business Academy un bes mas pa sigui cu e esfuersonan.
Agri-Fund
E programa di financiamento aki ta ofrece financiamento cu interes abou (na 2% di interes) pa apoya desaroyo y expansion di proyectonan agricola, y haci’e mas facil pa agricultornan obtene e capital necesario pa inverti den nan negoshi pa asina por aumenta productividad y promove nan sostentabilidad comercial.
Minister Wever a expresa optimismo tocante e potencial di e programanan aki pa inicia desaroyo amplio den e sector di agricultura comercial. “Si nos por demostra cu e modelo di Agri-Business Academy y Agri-Fund ta exitoso, nos lo regresa Parlamento den futuro cercano pa solicita fondo adicional pa sigui stimula e industria ariba un escala mas amplio,” minister Wever a declara.
E Ministerio tin plan pa anuncia mas proyectonan pronto cu lo sigui fortalece e sector vital aki. “Nos ta compromete na transforma e panorama agricola di Aruba, asegurando ‘food security’, y fomentando diversificacion economico,” Minister Wever a conclui.
