E situacion ta birando dia pa dia pio y ainda no a yega na un solucion definitivo riba futuro di RWZI. E decision di gobierno ta pa traspasa tur e facilidadnan di RWZI pa e compania Utilities NV. Sinembargo, den parlamento e proceso aki no a tuma luga ainda.
Mientrastanto e planta na Parkietenbos ta for di circulacion y esun di Zeewijk ta bou di presion. Y e bou presion aki ta literalmente pasobra tur truck ta bay eynan y manera por mira riba video, e tanki a cuminsa pasa over. Ta shete dia pa siman e trucknan di chica pos ta deposita nan material na Zeewijk.
Di otro banda, esun di Bubali Plas tambe tin problema. Tin caso contra gobierno den corte pa motibo cu e planta ey door di su mal funcionamento no ta procesa e material debidamente y causando holo malisimo den e area. Den e caso aki no tin un decision ainda.
Loke ta conoci ta cu e resto di material cu procesa saca na Bubali no tin caminda pa deshaci di dje, pasobra no por uza insinerado. Hasta gobierno a pidi permiso pa kima atrobe. E situacion ta manera un cadena di problema cu no tin un solucion inmediato.
