Cristo Hesus a declara un palabra cu nos mester tene debido cuenta cune: No montona pa tesoro pa boso mes riba tera,caminda mot y frusto ta destrui nan. Y caminda ladron ta kibra drenta horta, Ma montona boso tesoro pa boso mes den shelo, caminda ni mot ni frusto ta,destrui nan.
Y caminda ladron no ta kibra drenta ni horta. Pasobra caminda boso tesoro ta, eynan boso curason tambe ta. Telefon ta bon y util pa nos tur, pero nos no tin di laga telefon domina nos bida. Hopi hende a haci telefon nan Dios, cu asina nan falta nan telefon nan bida ta para. Hopi biaha cu internet cay afo, hende lo corda riba Dios, pasobra e gracia y fabor di Dios semper lo t’ey. Hende ta discuti y bay na malo cu otro pa motibo di telefon. Hopi maldad ta keda cometi pa medio di telefon, y maldad tin telefon como un medio di transporte, matrimonio y famia ta kibra pa medio di telefon.
Hende ta biba asina desconfia di otro cu esposo/esposa/ yuinan ta yama cu videocall. Telefon ta e causa cu hopi hende a cay cera, y nan berdad a sali na cla. Mal uzo di telefon a pone hopi hende perde trabao,y pa medio di esey, hopi famia ta tambalia. Hende tin mas tempo pa nan telefon,cu nan tin tempo pa Dios,lesamento di bijbel a baha hopi pasobra e telefon a tuma e tempo over.
Den mayoria di telefon tin un bijbel, pero si bo ta lesando bo bijbel y bo telefon ta ricibiendo mensahe ta imposibel,pa bo concentra den locual cu bo ta haci.
Pa nos sirbi Dios, nos mester pone tempo pa Dios, p’esey usamento di telefon ora nos ta atende cu Dios, no ta bay. Telefon a bira un medio di hipocresia, pa hende no duna cara na otro, pasobra awendia tin hende ta pordona otro via di telefon mientras cu curason ta duro cera contra e persona.
Salbacion di nos alma, ta sosode ora nos kere den nos curason y confesa cu nos boca cu Hesus Cristo ta Señor. Bo telefon no por salba bo, pero si e por complica bo bida. Mayoria hende riba mundo tin un telefon, bo telefon ta haci bo alcansabel, tur caminda, y tur hende sa na unda bo ta, pa medio di telefon tur hende ta numera, pasobra tur telefon rond mundo ta registra.
P’esey mundo ta trahando riba un chip pa ser humano, pasobra telefon por keda destrui, pero un chip den curpa di hende no por keda destrui of blokea.
Y despues di e rapto di Iglesia lo bini e temporada di e number e 666, cual lo indica cu esun cu no tuma e number, lo no por cumpra ni tampoco bende.
Esey ta e motibo cu Señor lo bin busca su pueblo, mescos cu E a saca Lot for di Sodoma y Gommora. Telefon a bira idolatria, ya cu e ta haci hende mas materialista, y asina kita hende su bista for di riba Dios.
Coronavirus a separa hende for di otro cu te awe tin hende ta cana cu mondkapje y tin miedo di duna otro un brasa, pasobra e virus no a disparce completamente. Despues cu e virus a keda combati, awor mundo ta preparando pa ta digitalisa completamente. Shelo y tera por pasa, mas e palabra di Dios, no ta pasa. Nada tin mas poder cu Dios. Dios ta mas poderoso cu tur telefon, pasobra nada por kibra Dios su contacto cu nos.
No laga telefon bira bos Dios.
Sinceramente,
Pastor Marcel Balootje.
