Mi persona a haya hopi reaccion positivo di e articulo riba 24ora tocante e uzo di innovacion pa resolve e problema di crisis pa yega na un vivienda. Den e articulo aki nos lo bay den detaye con uzando innovacion nos por brinda full Aruba un vivienda pagabel cu pa colmo ta extra zuinig den uzo di coriente. Tambe pa full pueblo realisa cuanto e mal maneho di Gobierno Wever-Croes II ta costando nos den un forma hopi directo. Nos lo mustra cu un cas por costa menos di 80.000 florin uzando tecnologianan cu pa colmo no ta ni di mas nobo.
BioHome3D: Cas pa $40.000,- All-In
Uzando data pa colmo bieu di 3 aña pasa di un colaboracion di University of Maine yama “Factory of the Future 1.0” uzando un 3D Printer por construi un cas den menos cu 5 dia. Uzando e sistema anticua aki a construi varios cas yama “BioHome3D”. En berdad e ta un cas relativamente chikito na 70m2. Pero e costo all-in pa construi esaki ta $40.000,- US so. Cu ta 75.000,- florin. Esaki ta cubri tur, tur cos pa traha e cas aki incluso dak.
E sistema nobo “Factory of the Future 2.0” ta hopi mas eficiente ainda y por traha un cas den 3 dia di e materialnan di mas sostenibel cu ta corta e footprint ecologico di un cas den manera masivo.
Mas informacion por haya via e siguiente link:
https://www.popsci.com/technology/worlds-largest-3d-printer/
Awo un otro compania Icon cu su 3D Printer di Cas di mas moderno yama “Phoenix” por print muraya di cas pa solamente $3,- US Dollar pa ora. Ademas no mester ni paga architect pa designa e cas paso esaki ta bin den e pakkete. Esaki ta incluso e diseñonan di mas imaginativo y bunita di diseño arkitectonico crea pa un Inteligencia Artificial sofistica.
Mas informacion di Icon su Phoenix 3D Printer por haya na e siguiente link:
https://www.bloomberg.com/news/features/2024-03-12/this-ai-architect-will-design-your-climate-friendly-dream-home?embedded-checkout=true&sref=51oIW18F
Cas Ultra-Zuinig den Coriente:
Coriente na Aruba pa tene un cas na un temperatura agradabel ta e costo di mas grandi pa un habitante riba nos isla. Uzando diferente solucion cu implementa mañan mes por haci cas na Aruba masha zuinig mes.
Verf Dak cu Verf Special
Mayoria di e cayente cu ta haci un camber calor na Aruba ta bin via solo cu ta haci un dak di cas cayente. Uzando verf special “solar reflective” cu ta costa mas o menos $80,- US pa bleki, por verf un dak di un cas chikito. Bezig ta wak cu Aruba tin hopi orario di solo briyante esaki riba su so caba lo por haci un camber 5 grado Celsius mas friu. E solucion low-cost aki por spaar cerca 35% riba un cuenta di coriente.
Airco Nobo
E airconan di mas nobo na Aruba tin un energy label di SEER2 di 20. Compara cu airconan di djis 5 aña pasa esakinan ta ongeveer 40% mas eficiente.
Dus atrobe por spaar den KwH cu e airconan moderno aki.
Glas Getint
E di dos parti unda cayente ta drenta un camber ta via bentana.
Awo por cumpra “Suncontrol” foil cu por coat riba un bentana existente.
Dus no mester ni cambia e bentana. Information di 3M ta indica cu esaki lo por reduci gasto di cooling un bez mas cu 30%.
Plafond Insula cu Fan.
En fin. Blafonnan mas insula lo zorg pa menos friu sali. Combina cu un “smart fan” di blafon pa aire friu di airco circula miho, e gevoel di temperatura di un camber lo ta mas agradabel sin cu mester baha e temperatura di e airco.
Conclusion:
En fin por traha cas di pueblo cu ta ecologico hopi avansa y super zuinig mes den coriente pa menos di 80.000 florin.
Awo ta dicon nos no ta wak esaki na Aruba? Sabiendo cu tin un crisis di costo di bida enorme mes.
E mal maneho di e Gobierno aki ta costando full Aruba placa den un manera directo.
