Den menos cu un siman wrakingskamer a yega na un decision riba e peticion di gobierno pa kita hues mr. van de Leur for di e caso di Isla di Oro. A rechasa e peticion ya cu a conclui cu no tin motibo pa esaki.
Tabata dia 5 di april ultimo cu gobierno durante tratamento di un caso sumario a wraak e hues verbalmente. Mesora e griffier a traha e procesverbaal. E hues a manda su reaccion por escrito dia 8 di april caba y a bisa cu e no ta acepta e peticion. A trata esaki e mesun dia den wrakingskamer.
A trata e peticion aki unda tabata presente e hurista di gobierno y den sala tabata presente representante di Fundacion Parke Nacional Aruba (FPNA) esta abogado mr. Arendsz-Marchena; J.O.B. Holding & Management V.B.A. representa pa mr. Anthony Ruiz y Aruba Youth for Ocean, Stichting Turtuga Aruba, Fundacion Proteccion y Conservacion, y Aruba Birdlife, representa door di mr. Rep. E hues gewraak mes no tabata presente pa tratamento.
A splica cu e peticion di gobierno a bini despues cu hues a bisa cu el a experencia varios biaha cu gobierno a tuma decision en contra di ley. Esaki a pone cu e hurista a bisa cu ta wraak e hues pasobra e no ta imparcial. Wrakingskamer a conclui cu no tin muestra di falta di imparcialidad door di e hues. E expresion cu e hues a haci ta di indole general.
Si gobierno y tur su departamentonan ta mantene nan mes nechi na ley, e ora den tur caso contra gobierno tur obhecion of apelacion lo a wordo declara sin base. Ta un echo di conocemento general cu esaki no ta e caso. Por lo tanto e remarca ey di hues no ta un prehuicio pa cu merito den e caso aki. E ariba menciona ta motibo cu a rechasa e peticion di gobierno pa wraak e hues van de Leur.
