Tin biaha un hende ta puntra dicon e cosnan aki ta pasa cu mi, dicon tin tanto contratiempo asina.
Awel nos kier bisa cu ora Dios tin mester di un hende,ora Dios ta yama un persona, pa wordo uza pa su Gloria, Dios por haci tur cos te na e momento cu e persona dicidi di entrega su mes na Dios y sirbi Dios,
Pasobra Dios ta busca hende fiel, dispuesto, y constante pa haci su trabao, Dios no ta busca un persona pa un temporada so, pero un persona cu Dios por conta cu ne na tur momento, mescos cu e persona por conta cu Dios.
Un persona dispuesto , no ta un persona cu ta keha, murmura, of rebeldia, pero e ta un persona cu conoce su luga den e trabao di Dios. Y e ta haci locual Dios a mand’e haci cu goso, pasobra e sa cu ta pa Señor e ta hacie, y ni maske cuanto contratiempo tin e ta dispuesto pa cumpli cu Señor.
Un persona constante ta esun , cu tur ora t’ey den presencia di Dios, tur caminda cu e bay e ta yama riba e presencia di Dios, e ta ancra de Señor, su boluntad ta di haci boluntad di su Tata cu ta den cielo. E ta rechasa pica specialmente idolatria, tur locual kier stroba den e servicio di Señor e ta rechasa, e ta dispuesto pa entrega su bida, pa asina e nomber di Señor wordo glorifica, un persona asina por conta tur momento cu Dios.
Den e buki di Daniel capitulo 6, Daniel a demostra nos kico ta nifica constancia den Señor, y esey ta locual awendia a bira hopi scars.
Den Daniel 6:10 ta para skirbi: Daniel a haya sa cu e documento a wordo firma, e a bay den su cas, den su camber ariba e tabatin bentana habri den direccion di Jeruzalem. Y e a sigui hinca rudia tres biaha pa dia. Daniel tabata sa cu su bida ta core peliger, pero toch e a keda constante di Dios.
Ora e yega e momento cu Daniel ta bay wordo tira den cueba di Leon pa motibo cu e no ta participa na idolatria. Y rey Dario mes a papia bisando: “Daniel bo Dios cu bo ta sirbi constantemente E mes lo libra bo.” Ora nos ta sirbi Dios constantemente hasta nos enemigonan tin cu reconoce esey.
Fieldad , Disponibilidad, y Constancia, no ta wordo bendi den supermercado, pero nan tin nan preis di obediencia, un prijs caminda hende ta pone Dios na prome lugar y ta haci tur locual ta posibel, pa ta un berdadero discipel di Cristo.
Obediencia ta fundeshi di tur cos , manera nos tur sa un cas sin fundeshi ta un cas hopi debil awel asina mes un bida sin obediencia, ta un bida sin direccion.
Pasobra den nos bida, nos mester tene cuenta ken nos ta obedece, pasobra tin hende ta menciona Dios su nomber , pero kier biba manera nan kier y no ta duna obediencia na Dios.
Si un hende bisa cu e ta stima Dios, y ta odia su ruman, e ta un gañado,pasobra esun cu no ta stima su ruman cu e ta mira, no por por stima Dios kende e no ta mira.
Tur hende cu ta stima Dios, ta pone nan mes dispuesto pa su obra. Nan no ta funciona a base di propio kier, pero nan ta pone Dios na prome luga, y no traha pa nan propio interes, pero semper nan ta pone Dios dilanti den tur cos.
Na Dios tur e Gloria pa fabor ricibi,
