Aruba Aquatics Federation, e federacion di deportenan acuatico na Aruba tin e placer pa anuncia cu durante e siguiente fin di siman lo tuma luga na Aruba un “International Certification School for Artistic Swimming Judges” organisa pa FINA, e organisacion mundial di deportenan acuatico. Tur hues di e deporte aki mester sigui diferente clinica y curso prome cu nan por wordo nomina pa ta un hues FINA.
Na momento cu ta un hues di FINA e ora por para hues na e competencianan di nivel mundial y Weganan manera Weganan PanAmericano of hasta Weganan Olimpico. E curso aki lo tuma luga na Alhambra Ballroom y lo tin un total di 24 participante. E participantenan ta procedente di Canada, Santo Domingo, Brasil, Costa Rica, Peru y Aruba.
Historia di Landamento Artistica na Aruba
Barracudas Artistic Swimming Aruba desde 1973 a introduci e comunidad di Aruba na e bunita deporte di landamento sincronisa, den 2017 a cambia e nomber di e deporte pa landamento artistico. E meta principal di e club ta pa brinda atletanan oportunidadnan pa desaroya y prepara nan mes den e deporte pa e competencianan internacional.
Recientemente a habri e deporte pa mucha homber por participa mirando e desaroyonan den e deporte internacionalmente. Pa mas informacion of pa conecta cu nos por bishita: Facebook @barracudas.aruba of nos website: www.barracudasaruba.com, Barracudas Artistic Swimming Aruba ta e unico club di Landamento Artistico na Aruba y ta afilia na Aruba Aquatics Federation cu na su turno ta miembro di F.I.N.A.
