Durante conferencia di prensa den presencia di Minister di Salud Publico y Turismo hunto cu e directornan di hospital, ImSan y AZV, a tuma luga firmamento di MoU entre Dr. Horacio E. Oduber Hospital y Instituto Medico San Nicolas (ImSan). Durante algun luna intensivamente tabata bezig cu e negociacionnan por a yega n’e acuerdo di cooperacion entre ambos instituto pa prome bes den historia.
Dangui Oduber, Minister di Salud Publico y Turismo, a splica durante e conferencia di prensa cu e momento aki tabata uno special y historico, unda cu e dos institutonan cu ta duna cuido medico na Aruba a firma acuerdo di cooperacion. Tambe AZV y Ministerio di Salud a firma e acuerdo aki. Den e ultimo lunanan tabata negocia e acuerdo di cooperacion.
Segun e mandatario a duna hopi tempo y espacio na ImSan como hospital pa duna feedback, input y contribucion, p’asina tur partido tabatin consensus riba e contenido di MoU. Pa prome biaha den historia cu ta firma MoU unda cu e partidonan ta bay traha mas intensivo cu otro. E mandatario a indica cu nan ta contento cu e calidad di cuido cu hospital y ImSan ta brinda na comunidad, e calidad halto di servicio, e profesionalismo, e specialismo cu ambos instituto tin.
Jacco Vroegop, director di Dr. Horacio E. Oduber Hospital, a indica di ta contento cu nan a yega na acuerdo. A tene combersacion pa hopi luna riba e acuerdo di cooperacion. E cooperacion ta importante y na final e ta bay p’un cos so cu ta e pashent, e habitante- y bishitantenan di Aruba, e refugiadonan, y trahando hunto pa percura cu tur hende haya e miho cuido. Trahamento hunto mester hiba na compliment otro y ta hacie hunto. Hunto ta percura pa saca lo miho dje hospital, di e clinica, di nan hendenan.
Nan ta haci tur cos cu pueblo por spera di nan, pero tambe ta mira e parti di costo. Ta percura pa bay eficiente cu nan recursonan. Segun Vroegop, tambe pa comunidad ta orguyoso di nan. E ta contento cu a logra esaki y ta e prome stap pa cumpli cu e puntonan importante.
Joel Rajnherc, director di ImSan, a gradici pa tur esfuerso haci pa por a yega na un momento den historia di cuido medico di Aruba. Tin dos instituto medico cu por ta hopi orguyoso di dje. C’un isla di mas o menos di 110 mil residente legal por tin dos instituto asina halto calibra cu nunca a yega di traha hunto pa ainda mehora e calidad di servicio, e accesibilidad di servicio. Tambe pa percura cu ora di bira mas eficiente cu pashent tin mas derecho den cuido.
Tin hopi mas reto den cuido, pero esaki ta simplemente e comienso di un cooperacion, un colaboracion entre ambos instituto mas grandi. Rajnherc a indica cu si nan no bay colabora cu otro, e pashent ta esun cu lo bay sufri. E AZV cu tin ta esun cu ta bay sufri, pasobra costo di cuido ta sigui subi drasticamente. Si no haci algo awo, ta perde tur cos dentro di poco tempo. P’esaki el a gradici e mandatario pa su esfuerso, Vroegop p’e colaboracion.
ir. Edwin Jacobs, director di AZV, a indica cu e cooperacion entre ImSan y hospital ta riba agenda di AZV. A inicia esaki mas cu dos aña pasa y a inicia e esfuerso pa yega n’e cooperacion entre ImSan y hospital bou e proyecto Lego. Na cierto momento e esfuersonan no tabata duna su fruta, pero minister Oduber a tum’e over. E ta gradici con cos a bay y awe por pone e base pa e cooperacion entre e dos institutonan aki.
Pa mas lesa TREMPAN.COM.
