Despues di hopi tempo, por lo menos for di october 2023 e reunion tabata (ov-klaar) pa trata den parlamento, pero MEP a wanta e reunion. MEP a hay’e obliga di yama e reunion bou presion mirando cu nan partner den coalicion, Misha Raymond a manda un carta cayente p’e presidente di parlamento dunand’e tempo stipula p’e yam’e reunion.
Porfin dia 8 di mei a trata e reunion. For di trempan, e lider di MEP, mr. Evelyn Wever-Croes a comenta cu e ta contra pa e reunion tuma luga, mirando cu e ta prefera pa warda resultado di casacion prome cu trata e reunion den parlamento. Ta netamente locual a sosode tambe, e reunion a termina cu dies voto na fabor y dies voto contra.
Ex-lider di fraccion y alabes Parlamentario, drs. Shailiny Tromp-Lee a dicidi di abstene di vota, pa cual e ley a keda den memey. Awo tin e presidente di e organo mas halto na nos pais tin trinta dia pa yam’e reunion bek. Ta net locual e lider di MEP tabata kier, pa cumpra tempo, sperando e resultado di casacion.
Abogado, mr. David Wever ta representa Fundacion Orguyo alabes ta un di esunnan cu mas a traha y skirbi riba e ley. Pues, durante e reunion publico, e tabata presenta p’asina yuda e iniciadornan di ley; contesta tur pregunta y of preocupacionnan di e parlamentarionan.
Wever mes ta sinti cu e reunion a bay demasiado largo, cuminsa trempan y caba te laat. Apart di e parti huridico, claro, den parlamento ta politica tin. E ley aki ta importante pa pasa, nos constitucion ta papia cla di derecho igual. E echo cu ta exclui derecho di pareha di mesun sexo, ta contra nos constitucion y esey ta unda nan ta actualmente te den corta di casacion pa ricibi nan derecho. E ley netamente ta basa riba e obligacion pa cumpli cu constitucion.
Claro, tin declaracionnan religioso, pero aki ta mira e parti di derecho humano y e ley tin cu cumpli cu nos constitucion. Na momento cu e ley no ta cumpli cu nos constitucion, ta crea espacio pa laga un hues, husg’e.
E resultado, Wever ta mir’e como uno postivo. Claro, e tabata mas nice su nos mesun hendenan, esta nos parlamentarionan a pasa e ley en bes di warda riba Corte di Casacion trat’e. Ta mira cu tin un cantidad confortabel pa pasa e ley. Di otro banda, tin e parlamentarionan cu a vota contra, mirando cu nan ta prefera di warda e resultado di casacion pa dicidi. Hasta tabatin algun cu ta PRO, pero ta prefera di warda. Wever a conclui bisando cu toch nan ta satisfecho.
