Un grupo di brommer di Aruba a haya invitacion di Willy Lopez pa participa den e competencia di Bracketazo para Papá na Orlando Speed World. E competencia aki a tuma luga na Orlando, Merca. Entre e ocho coredonan di brommer cu a competi tabata Kennedy Geo, Marvin Alberto, Geo Geronimo, Miljenka Franken y Angelo Ras. E coredonan di brommer a competi den fin di siman tras di lomba, pero e competencia no tabata facil.
Diabierna Kennedy Geo, coredo di brommer, a haci un tempo di 7:21 y tabata e number 1 den cualificacion den Quick System Bike. Pero diasabra e brommer di Geo tabatin problema di motor. Esey a pone cu mester a baha esaki y pone uno nobo. Geo a splica cu nan a keda sin drumi pa por a drecha e brommer, p’asina por a competi.
No ta prome bes Geo ta competi na Merca. No ta prome bes cu e topa cu algun problema cu e brommer. Na Valdosta, Georgia, tambe el a topa cu problema di brommer manera a pasa na Orlando. E ta haya cu Orladno Speed Way no ta malo, pero e tabatin problema.
Geo a indica cu nan lo tin dos careda mas. Nan lo regresa den e lunanan di september y december.
Marvin Alberto, coredo di brommer, a indica cu esaki ta prome bes cu el a competi na Orlando. Aña pasa su ruman a competi na Valdosta, Georgia, y e biaha aki nan ta cu henter e grupo. Nan ta cu Ras Racing y e biaha aki ta competi pa representa Aruba. El a keda encanta cu e competencia di Bracketazo para Papá. E trato cu nan a ricibi ta tremendo y nan a pasa bon. Si tur cos ta bon otro aña nan ta eynan un biaha mas.
Gio Geronimo, coredo di brommer, a indica cu e experencia tabata great. Nan tabata un poco laat, pero e experencia a bay bon y nan a ricibi un bon trato. El a indica cu el a dal su personal best cu tabata di 7:35. E ta contento cu su resultado, pero ta lamenta di a haya un ‘red light’ manera Alberto a haya.
Geronimo a indica cu si tur cos bay bon nan tin pensa di laga e brommernan Merca pa tres careda, mirando cu na september y december nan lo ta bek. E ta haya cu na Orlando tabata calor, pero a experencia su miho tempo.
Miljenka Franken, coredo di brommer, a conta cu tur cos a cuminsa c’un yamada y e tambe a bay Orlando pa competi. Esaki ta prome bes cu el a competi na Orlando. Pa loke ta e brommer, esaki tabatin un setting completamente nobo. E ta contento cu su resultado, pero awo ta bay tune e brommer pa asina sigui baha su tempo un tiki mas. Su meta den e competencia di Bracketazo para Papá ta pa core den un tempo di shete.
Angelo Ras, coredo di brommer, a conta cu e experencia na Bracketazo para Papá tabata uno bon y hopi hende. Su brommer si a bay bon, manera tabata kier. E ta bay mantene su plan actual, esta competi den e siguiente Bracketazo. Pa december e ta bay dal e cu mas boost p’asina e bay mas duro. Su deseo ta pa dal un seis prome cu e regresa Aruba.
