Sorprendi un grupo di windsurfer Boneriano a keda na momento cu cara serio funcionario di Duana a informa nan cu mester paga pa drenta cu nan ekipo. Esaki despues cu nan tin hopi aña biniendo pa e competencia y nunca mester a paga.
Windsurfernan ta yegando Aruba pa e competencia internacional Hi-Winds y un grupo cu a yega di Boneiro, a haya un sorpresa desagradabel na Aeropuerto Internacional Reina Beatrix. Normalmente nan ta yega recoge nan ekipo y sigui. E biaha’ki na yegada no a haya nan ekipahe pero no a haya esakinan. A informa nan cu mester bay “klaar in” nan ekipo di competencia prome.
Segun e publicacion riba e corant Hulandes NU, seccion di Aruba, un funcionario di Duana a bisa un windsurfer: “Nos no sa, boso lo por bende e ekipo”. Y esaki, segun e windsurfer Pieter Zweers, ta motibo pa e funcionario exigi nan pa “klaar in” e ekiponan. Diferente Boneriano a haya nan mes cu e problema aki, 7 di mei. “Mi ta biniendo aki pa mas di 30 aña pa participa den Aruba Hi-Winds. Semper mi ta bini cu mi mesun ekipo. Nan ta warda den un tas grandi rondo. Y esaki ta prome biaha cu mi ta haya mi mes confronta cu e regla aki,” el a bisa hopi sorprendi.
Pa por participa toch na e evento di Aruba Hi-Winds, cu ta tuma luga for di 8 pa 13 di mei, e mester a paga en total 786,95 florin pa tres persona. “Esaki ta straño. Mi materialnan no ta nobo, y bo por mira esey. Y toch mi no a logra convence e funcionario,” segun Zweers.
Despues cu el a paga e suma ariba menciona, e por a cana bay na e deposito unda su ekipo tabata warda. Pero a resulta cu nan tabata eynan tampoco. Accidentalmente, su ekipo a sigui cu Z-Air pa Corsou. “Mi ta kere cu si mi no a paga, un dia despues mi por a simplemente bay recoge mi cosnan. Esaki a resulta di ta e caso cerca un di e otro windsurfernan. E no a paga, pero e siguiente dia e por a bay recoge su ekipo. Pero mi ta contento cu mi a haya esunnan di mi y cu mi por participa na e evento.”
A informa e organisadonan di Aruba Hi_Winds, kendenan a tumacontacto cu Duana caba y ta spera riba contesta di e hefe. “Ban spera cu mi haya un contesta positivo. Si e t’asina den futuro, e ora esaki ta ultimo biaha cu mi ta participa den Aruba Hi-Winds,” e windsurfer a comenta.
Riba e fotonan tin un copia di e recibo cu el a ricibi despues di a haci pago y potret di su ekipo pa participa den e competencia di Hi-Winds.
