Un control y vigilancia estricto den e siman tras di lomba na un deposito y container den waf na Rotterdam a produci diferente detencion. Y despues a bin descubri droga, manda for di Aruba den un container.
E bista tabata dirigi riba e hendenan cu ta contrata pa saca mercancianan pero tambe hendenan cu a descubri canando rond di e deposito mientras cu nan no ta traha eynan. A bin ta vigilando e personanan aki cu na Hulanda ta yama nan “uithalers”. A detene personanan cu tabata baha algun di e personanan aki den cercania di e deposito menciona na Rotterdam.
Despues di diferente detencion, funcionarionan di Duana a dicidi di tira un bista den e containernan poni riba un tereno cu ta uza pa deposito. A bay cu diferente cacho specialisa pa detecta droga y un scanner mobil. Hopi lihe a canta bingo.
Durante e control di un container / freezer procedente di Aruba, a constata diferente cos straño. Den e bentananan di inspeccion, e duaneronan a bin descubri den cada un di nan un tas deportivo. Naturalmente cu e tasnan aki no tabata bashi, pero yena cu paki di cocaina.
A sigui busca den e compartimento patras y a bin descubri algun paki los mas, cu tabata contene cocaina. Den e dos tasnan a haya en total 33 pakete y 11 otro los den e compartimento patras. Pues en total 44 paki cu cocaina cu inicialmente a bisa tin un balor di 3.5 miyon Euro.
Den e ultimo aña Duana a descubri diferente transporte di droga pa Hulanda, esta cu a stroba nan di sali for di Aruba, entre otro scondi den airco, den hariña y hasta den piesanan di auto. Ultimo aki mes tabatin un caso den corte contra dos homber cu tabata envolvi den dos transporte pa en total 107 kilo di cocaina. Nan a haya castigo di 4 aña. Banda di esnan descubri, probablemente tin tambe cu a logra pasa sin cu e detecta nan.
