E Keniano Eliud Kipchoge, cu tin record mundial di maraton, a kibra diasabra na Viena e legendario barera di dos ora riba e distancia cu un tempo di 1 ora 59 minuut y 40 seconde, un marca cu sinembargo no lo ta oficial, debi na e ayudonan externo cu el a ricibi.
E Maratoniano mas rapido di historia a rebenta e oloshi coriendo 42.195 meter na un velocidad averahe normal di un sprint, cu un averahe di 17 seconde pa cada 100 meter, 2 minuut 50 seconde pa kilometer.
Kipchoge a realisa e ultimo meternan su so y a drenta e meta na hariment.
E coredo di fondo, record mundial di maraton (2:01:39), tabata e protagonista solitario di un carera traha na su midi, “Ineos 1.59”, den cual el a conta cu ayudo externo no permiti pa e Federacion Internacional di Atletismo (IAAF) y por lo tanto su marca no lo ta apunta.
E careda a cuminsa pa 8’or y 15 ora local cu condicionnan climatico un poco pio di a spera inicialmente, cu niebla y un humedad di 90%, loke a aumenta e desgaste.
Kipchoge, cu a claba tempo di forma constante, a core tras di un auto cu tabata marcando e ritmo pa bati e record di dos ora y rondonda pa shete coredo, den formacion di flecha pa proteh’e di e biento.
E shete coredonan aki tabata forma parti di un ekipo di 41 atleta di prome nivel cu a bin ta turna a lo largo di henter e careda pa dun’e apoyo.
E coredonan aki tabata di un seleccion di atleta di prome rango, manera e tres rumannan Noruego Ingebrightsen – Henrik, Filip y Jakop – e Etiope Selemon Barega, reciente subcampeon di mundo di 5000 meter of e Mericanonan Bernard Lagat y Paul Chelimo.
Tambe el a conta cu suplementonan den movecion y un circuito completamente plat y adapta, hasta cu partinan recien asfalta pa evita iregularidadnan..
Miles di persona a madruga pa anima e atleta den un prueba cu a tuma luga den e parke Vienes di Prater, den un circuito completamente plat di 9,6 kilometer, di cual e inmenso mayoria di e recorido ta recht y liber di palo.
Tabata 4.3 kilomter bay y otro tanto di buelta. Na ambos extremo tin dos rotonde amplio cu a wordo adapta pa evita cualkier desnivel.
Aunke ta trata di un maraton di laboratorio, den cual tabata calcula te na e minimo detaye pa bati e record, core riba un ritmo asina brutal y kibra e muraya di e dos ora, ta permiti Kipchoge drenta den olimiada di e Deidade di e deporte.
E atleta Africano a sigura cu e careda aki, apesar di no ta oficial, ta esun mas importante cu e record cu el a logra aña pasa na Berlin, pasobra kibra un di e fronteranan mitico di e deporte lo permiti’e drenta den historia y inspira henter un generacion.
E ritmo di e careda a mehora e miho marca anterior di historia, 2:00:25 cu e propio Kipchoge a haci den e circuito di Monza (Italia) den e desafio anterior pa baha di e dos oranan y den cual el a fracasa pa 26 seconde.
E atleta, cu solamente a wordo derota den un ocasion di un total di 12 maraton – un di dos luga na Berlin 2013 -, a vence diasabra hasta su unico rival riba pista: e cronometro.