Por a tuma nota di un sentencia den e kortgeding di SADA y Edwin Duijneveld tabata para hunto cu e sindicato e momentonan ey. For di den corte caba a indica cu Gobierno ta un instancia cu no por confia.
Manera tur hende sa durante e gobierno anterior a instala un comision na unda DRH tabata aden. Tambe tabata tin trahadonan di e Ministerio, leiding di Aduana y sindicato SADA, pa bin cu un salarishuis y functiehuis nobo.
Esaki ta mescos cu e proceso di tanto polis como brandweer. Esaki ta mas bien pa e servicio uniforma y pa trece nan mas cerca di otro. P’esey mes, ora cu a bin e conseho final di e comision, cu e minister a tuma over y a aproba door di Ministerraad, a firma un convenio entre e gobierno y e sindicato SADA, na unda e prome paso tabata pa haya un aumento na juli 2017, fuera di esey e invoerring di salarishuis y functiehuis entrante januari 2018.
E momento ey cu tin un acuerdo y ta cuminsa cumpli cun’e, bo tin cu sigui. A bin un cambio di gobierno. Tur hende sa cu ta un gobierno tin, y no ta pasobra un partido ta cambia, Duijneveld, consehero huridico di SADA a comenta..
SADA a warda un rato pa laga e gobierno sinta. A acerca nan y for di cuminsamento no a haya oido te cu na januari 2018, cu a sinta hunto cu e minister nobo.
A bisa e tempo ey cu lo cumpli cu e convenio, pero mester duna nan tempo, mirando cu nan mester traha riba LBham, unda cu tur cos ta wordo poni den otro, con cada funcion ta. Ta cosnan logico cu manera e decision a wordo tuma. “Si e color di e gobierno no a cambia, esaki lo a cana su caminda manera cu e mester a cana igualmente,” segun Duijneveld.
E straño ta cu den e temporada aki a pidi un conseho na DRH, unda cu e mesun departamento aki cu a traha den e comision y a duna conseho na e minister pa e convenio final, ta contradeci y bisa cu no por bay di acuerdo cu e Convenant pa cierto motibonan.
Pero e reunionnan a sigui y a sinta hopi biaha hunto, miembronan tabata tin hopi pasenshi. E directiva cada biaha ta splica e miembronan pa nan warda y no preocupa. Solamente tin cierto cosnan cu tin cu regla, pasobra esey ta loke a bisa. Hasta a traha e LB HAM, pero prome minister a mand’e bek cu mensahe na DRH, cu e no ta bon y mester trah’e manera cu ta den e convenio.
Dado momento el a tarda te cu a yega 23 di augustus 2019, na unda cu den e reunion porfin unda un carta a bay prome cu ta bisa cu awo kier un fecha di e implementacion cu e acuerdo ta wordo honra completamente y den e reunion eynan a bisa cu no por duna fecha. Pero e siguiente siman por duna fecha y hasta eynan, minister di husticia, a bisa cu ta september sino october por paga y e asunto por keda cla.
Un siman despues a pospone e reunion. Gobierno a laga sa cu no por sinta hunto. Un siman despues, dia 9 di september a sinta hunto, pero no por a cumpli cu e convenio.
Despues di a wordo engaña pa tanto tempo, tur cos a rementa cerca e miembronan y nan a dicidi subi caya. Gobierno como tambe ATIA, Camara di Comercio, a hiba SADA corte. Hues a constata den corte, cu e manera di actua di gobierno, ta causa cu no tin confiansa mas den e gobierno y nan tin un problema, cu nan tin cu soluciona.
Ta p’esey tambe, a pidi un orde maatregel, unda cu gobierno ta pidi hues pa stop e welga, laga e kortgeding tuma luga y despues di e sentencia, mira kico ta kico. E hues no a preocupa cu orde maatregel y a bisa pa laga nan welga, cu despues e ta trata e caso y cu tur su rason e ta bisa cu e accion a wordo anuncia mucho cortico prome cu el a cuminsa y no tin un final.
Eynan hues no a corta e welga di biaha. El a haya e welga cu huridicamente tin valides. Hues a bisa cu nan por sigui welga, manda e mensahe cla y raspa te cu 6’or di mainta e siguiente dia.
Eynan ta pone un cool off period, no manera hopi biaha ta pidi y duna cu ta seis luna, pero di un luna. Den e luna, el a conseha pa yega na otro. Si no, den un luna, cos por explota atrobe. Na e mesun momento SADA a entrega un contrademanda, unda ta pidi hues pa laga gobierno cumpli cu e acuerdo y hues a bisa door cu ta un kort geding, ta un tiki dificil, pero lo conseha pa bay den bodem procedure, locual e tin full rason tambe.
Den e caso mes algo a pasa cu lo por tin consecuencia pa cualkier hende cu ta sinta na mesa y purba di bin na un acuerdo cu gobierno di Aruba. Gobierno a bisa den corte cu un acuerdo of convenio of protocol cu gobierno solamente ta duna gobierno e obligacion di purba di haci nan best pa cumpli cu e acuerdo y si no por no por. E ora eynan, manera cu a constata ora cu abogado di SADA a trece dilanti, e gobierno ta bira un instancia cu no por confia pa sinta negosha cun’e. Den cualkier momento nan por bin dilanti y bisa no.
