Nos beyesa, Miss Universe Aruba Kiara Arends, a yega Aruba diasabra atardi. Su prome palabranan tabata: “mi ta hopi feliz di ta bek”. Na mes momento, Kiara a gradici tur cu a dun’e sosten durante su trayectoria como Miss Universe Aruba.
Kiara su sentimentonan ta manera ya caba a menciona “feliz di ta na cas”. E ta sinti cu el a gana hopi experiencia y alabes e ta contento di e manera con Aruba a acept’e.
Un etapa nobo a cuminsa..
Kiara ta sumamente emociona mirando cu e ta bek na Aruba y esaki ta nifica cu un etapa nobo ta cuminsa p’e. E proximo paso pa Kiara ta pa e caba su Master den Ley. Arends ta mira su mes trahando como un abogado aki na su isla.
Su experiencia den Miss Universe
Pa Kiara e experiencia den Miss Universe a dun’e hopi “network”. El a comenta cu tabatin 84 diferente pais cu delegacion grandi. Arends a conoce hopi doño di negoshi y a gana hopi experiencia.
Sosten ta importante
Sosten di su isla ta importante pero naturalmente e sosten cu bo mes tin pa bo mes. Mester keda pusha bo mes tur ora. Sigur no ta facil como un pais chikito pa bay contra pais grandi. Importante, segun Kiara, ta pa realisa e luga fo’i caminda cu bo ta bin ta locual cu ta defini bo exito.
Tin obstaculo
Kiara a comenta cu el a bira malo na diferente ocasion prome cu el a sali rumbo pa e certamen di Miss Universe. Sinembargo esey no a strob’e di sigui pusha. Arends a describi e obstaculonan como oportunidad cu el a haya pa avansa pa un nivel nobo.
Danki!
Por ultimo Kiara a gradici Dios, su famia y tur hende cu di un forma of otro a aporta su exitonan. E conseho cu Kiara tin pa tur damita cu tin pensa di participa den un certamen ta pa investiga hopi y “kere den bo mes”.! Un factor importante den tipo di certamen asina ta “confiansa”.
