Quota y Fepoh ta bek cu campaña di ‘earplugs’ durante Carnaval 69

Diahuebs atardi Quota International of Aruba a yama un rueda di prensa pa anuncia cu nan campaña di bende earplugs den temporada di carnaval a cuminsa. 

E presidente actual di Quota, Luzina de Greef a yama e miembronan di prensa un cordial bonbini na e rueda di prensa pa nan por comparti algun informacion di nan proyecto di tur aña pa ‘cuida bo oido’ specialmente den tempo di carnaval. Un danki na cada un di boso pa semper sostene nos. Despues a pasa palabra pa e directora di Servicio Gladys Kock cu a elabora mas  tocante e proyecto aki.

Gladys a cuminsa pa tuma e momento aki pa manda palabra di consuelo na yiu, nieto y demas famia di Farida Mansur, un miembro activo di nos club cu a fayece y ta momentonan dificil tambe pa nos club. “Pero manera tin e dicho ta bisa cu e show must go on.” Un di e metanan di Quota ta e Cuido di bo oido caminda por ehempel den luna di september nos tin e “Siman di Kibra Silencio” caminda e comunidad por haci un cita na Fepoh y na The Specialist pa un chekeo gratis di nan oido. 

Despues di dos aña cu nos a pasa den pandemia y cu no ta tin carnaval nos, di Quota ta bek pa nos corda y conscientisa nos comunidad cu carnaval ta hopi dushi pero nos mester cuida nos oido y proteha esaki contra e zonido duro y specialmente cuida e oido di nos muchanan.

Tur aña nos miembronan di Quota Club ta bende earplugs durante e paradanan di Carnaval y nos ta wordo reconoci pa nos shirtnan di Quota Blauw y e aña aki tambe blanco, cu nos logo riba dje. E prijs pa e earplugnan a keda mescos, cual ta Afl. 1 pa esun di mucha y Afl. 2 pa esun di adulto. Nos di Quota no por haci esaki sin ayudo di nos sponsornan pa e di 12 aña caba, WEB ta sponsor tur e earplugnan

di mucha. Tambe danki na WEB cu nos por bishita e scolnan basico caminda conhuntamente cu Glen Rock, di WEB, por duna charlanan na e muchanan di 6de klas. Asina nan por haya splicacion cu zonido duro ta dañino pa bo oido y si bo perde esaki e no ta bin bek. Nos a ripara cu den e tempo moderno di awe, e muchanan ta expone na zonido duro, manera musica di banda duro of ora di uza headphones, AirPods etc. E biaha aki e enfasis ta pa bishita e scolnan basico di pariba di brug.