Manera ta conoci, den ora di diahuebs atardi, varios coredo di truck septico a aglomera n’e planta di purificacion di DOW na Parkietenbos, p’asina mustra nan preocupacion p’e situacion. A laga cera e planta aki te cu proximo aviso y tur awa preto cu nan tin cu basha afo, mester sosode na Zeewijk.
Esey ta nifica cu si nan mester chica pos den area di Noord, nan mester core bay te San Nicolas pa nan por basha e awa ey afo. Y esey naturalmente ta bin cu su consecuencianan.
Den un rueda di prensa, nan a laga sa bon cla cu pa motibo di e situacion aki, chicamento di pos lo aumenta cu 25 florin pa cada pos cu nan chica y nan ta aumenta e prijs aki cu dolor na nan curason.
Mientras tanto 24ora.com a acerca Hoofd Beheer Infrastructuur di DOW, ing. Daryl Lue, kende a indica cu nan ta na altura di e situacion aki na RWZI Parkietenbos. Di biaha a tuma contacto cu e representantenan di e companianan di septic truck. Aki ta unda cu dos representante a bin na DOW pa por puntra kico ta nan preocupacion, p’asina ey kico DOW por aclaria e parti aki.
A indica en berdad cu e trabao ta birando mas hopi, pasobra nan tin cu bay te Zeewijk. E gastonan ta adicional pa loke ta Diesel. Tambe nan no tabatin un fecha cu e mantencionnan lo keda cla.
Di parti di DOW, a informa nan cu en berdad siman pasa a haya un problema na RWZI Parkietenbos, unda cu acumulacion di lodo a pone hopi presion riba e tubo, cu consecuentemente esaki a kibra y mester a cera e planta. Den e caso aki debi n’e sentencia di hues cu tin tambe di incinerator no por kima y esey ta acumulacion den tur planta y cu e consecuencia ya haya.
Pa mas informacion lesa TREMPAN.
