E competencia di Weganan Centroamericano y di Caribe 2023. Aruba ta representa pa 28 atleta den diesun deporte. Un total di 23 ta atleta femenino, mientras cinco ta masculino. Diasabra mainta riba e prome dia di competencia, Aruba tabata representa p’e atletanan di landamento como tambe landamento artistico. Aruba a logra su prome cinco medayanan, dos brons y tres plata. E competencia ta di 23 di juni pa 8 di juli.
Den landamento Elisabeth Timmer hunto cu Mikel Schreuders a logra clasificacion pa final B y final A respectivamente. Den landamento artistico mainta, Kyra Hoevertsz a haci su evento di Solo Tech.
Elisabeth tabata e prome atleta pa drenta pool n’e Compleho Deportivo Merliot y den su evento di 50m lomba a logra un tempo di 31.73 seconde cu a dun’e clasificacion pa final B cu tuma luga anochi. Mikel Schreuders a landa su evento di 100m free y a pone un tempo di 49.87 seconde cu clasificacion pa final A.
Atardi na Compleho Deportivo Merliot ambos atleta di landamento tabata cla pa landa nan respectivo final. Elisabeth Timmer a landa su evento di 50m lomba Final B y a posiciona su mes na di dos luga cu un tempo di 30.45 seconde. Algun heat despues tabata oportunidad di Mikel Schreuders pa landa su evento di 100m free. Schreuders despues cu na 50m no tabata entre e tres promenan a logra pusha y asina pone un tempo di 49.17 seconde cu a posicion’e na di dos luga logrando asina e di tres medaya di dia pa Aruba, den e caso aki uno di plata.
Na un venue diferente ‘El Polvorin’ a tuma luga e landamento artistico. Parti mainta Kyra Hoevertsz a haci su solo tech. Kyra tabata e ultimo atleta pa drenta piscina y haci su rutina dilanti e huesnan presente p’e Weganan CAC 2023. Na final el a logra posiciona su mes na di tres luga cu 196.6833 punto y asina aki tabata esun cu a duna Aruba e prome medaya. Na prome luga a keda e atleta di Colombia y di dos luga Mexico.
Na Prensa Latina Kyra Hoevertsz a bisa pa cuminsa c’un medaya nobo den e citanan aki ta algo hopi grandi. El a manifesta cu e reglanan di e deporte aki, cu ta combina ballet, landamento y gimnasia a cambia den e ultimo lunanan. Tambe tin hopi novedad den cual mester adapta pa competi miho. Hoevertsz a sigui indica cu nan ta disfrutando hopi. Hoevertsz ta competi den cinco modalidad.
Parti atardi un biaha mas ‘El Polvorin’ tabata cla pa ricibi e duonan di diferente pais. Den e rutina di Duet Tecnico, Kyra Hoevertsz y Mikayla Morales a sa di posiciona nan mes na di tres luga cu un punto di 175.7467. Na di prome luga a keda duo di Mexico y di dos luga e duo di Colombia. Asina Aruba ta termina e prome dia di competencia na ‘El Polvorin’ den Landamento Artistico cu dos medaya di brons.
Diadomingo nos delegacion a participa den e deporte di Landamento, Landamento Artistico, Tiro y como tambe Gymnasia n’e Weganan Centro Americano y del Caribe San Salvador 2023.
Den ora di atardi Kyra Hoevertsz a logra su di tres medaya, cual e biaha aki tabata di plata. El a competi den e categoria di ‘Solo Free.’ Nuria Diosdado di Mexico a termina na prome luga cu 161.2500, Kyra Hoevertsz na di dos luga cu 152.2667 y na di tres luga Monica Arango di Colombia cu 146.7542.
E di tres medaya di diadomingo a bini pa Patrick Groters den landamento di 200 meter individual. El a landa den un tempo di 2:01.9. Medaya di oro a bay pa Erick Gordillo cu a landa un tempo di 2:00.97 y medaya di brons a bay pa Jose Martinez cu a landa un tempo di 2:01.76.
Weganan Centroamericano y di Caribe
Weganan Centroamericano y di Caribe ta un evento multideportivo, cu ta realisa cada cuater aña desde 1926 den diferente ciudad di e paisnan di e region America Central y Caribe. E ta un evento multidisciplinario regional mas antiguo di mundo. E Weganan Centroamericano y di Caribe ta organisa p’e organisacion di Centro Caribe Sports.
E competencia aki a nace danki n’e iniciativa di e Sociedad Olimpico Mexicano despues di un actuacion pober di Mexico n’e Weganan Olimpico di Paris 1924. Nan a dicidi di organisa un evento polideprotivo entre e paisnan Centro Americano p’e deporte di e nacionnan aki aumenta nan nivel competitivo.
E aña aki ta tuma luga e di 24 edicion di Weganan Centroamericano y di Caribe na San Salvador, El Salvador. Na 2026 ta tuma luga e di 25 edicion na Republica Dominicana. Mexico y Colombia a organisa e evento aki cuater baha, mientras El Salvador, Republica Dominicana y Puerto Rico tres biaha; Panama, Cuba y Venezuela dos biaha; Jamaica y Guatemala un biaha. Mas di 30 pais ta competi den e Weganan Centroamericano y di Caribe unda tin mas di 50 deporte.
