Diabierna dia 16 di juni, despues di nuebe aña di no ta activo y di tene su artenan scondi, Rudyo Leysner a haya curashi y a habri su exposicion cu ta hiba e nomber di “Pathways”.
E artista Rudyo Leysner a conta cu e expo ta traha specificamente pa hende por admira y explora door di mira nan propio punto di bista den su artenan. Loke por admira ta un variedad di trabou haci for di aña 2017 te cu aña 2023. Nan ta trabou basta recien y tur ta hopi colorido y poco psicodelico. E meta ta pa hinca bo mes den e arte y mira algo diferente.
E emocionnan cu e ta transmiti ta pa e hendenan yega e expo cu un mente habri y cla pa mira algo diferente pa asina nan mes saca nan opinion. Tin alrededor di 31 obra di arte den e exposicion aki.
E idea di “Pathways” ta di bin di un trabou cu e ta bezig cu ne pa hopi aña caba y ta bay a base di yerba, color y naturalesa. Door di esey el a yega na e nomber pa su exposicion.
Pa Rudyo e exposicion ta importante mirando cu e tin nuebe aña sin haci un exposicion. Awo e ta un artista full time pues e tin mas tempo, el a aplica na Cas di Cultura y nan a bis’e cu si. Rudyo Leysner a duna di conoce cu e idea ta pa e exposicion ta interactivo. E color berde ta un color cu ta inspir’e hopi y e color aki ta sobresali tambe den su obranan.
Aruba por spera mas exposicion di Rudyo Leyser. E exposicion ta disponibel pa un luna largo. Rudyo ta sinti cu arte ta bayendo den bon direccion pero toch e ta fluctua hopi. Na final e artista a gradici tur hende pa e sosten duna na dje. E exposicion ta habri pa admira den Cas di Cultura.
