Minister di Asuntonan Economico, mr. Geoffrey Wever, a responde n’e creciente preocupacionnan expresa den Parlamento riba e deterioro di e poder di compra di e poblacion, poniendo enfasis riba e esfuersonan di gobierno pa atende e asunto aki.
Durante un sesion reciente den parlamento, a discuti e preocupacion cu, a pesar di e aparente mehoracionnan den e perspectivanan economico di e pais, hopi ciudadano ainda ta confronta dificultad financiero, cu nan cartera cada biaha mas bashi, pa cumpli cu e necesidadnan basico di nan famia.
Minister Wever a enfatisa cu gobierno ta tumando medida concreto pa garantisa un mayor stabilidad economico y financiero. El a señala cu, aunke e economia a stabilisa den cierto aspecto y finansa publico ta mustra señal di stabilidad, ta crucial traduci e mehoracionnan aki den beneficio tangibel p’e comunidad.
Un di e iniciativanan remarca p’e Minister ta e desaroyo di un “koopkracht module” (poder adkisitivo), un herment cu ta permiti calcula con pa mehora e poder di compra di e ciudadanonan. E medida aki, presenta recientemente den parlamento, ta brinda gobierno e capacidad di evalua y mehora e poder di compra di manera mas efectivo.
Fuera di esey, e minister a subraya e colaboracion entre varios ministerio, incluyendo e Ministerio di Asunto Social y e Oficina Central di Estadistica (CBS), pa identifica y sostene e gruponan vulnerabel dentro di e comunidad. Ta spera cu e accionnan concreto aki, cu ta inclui ahuste n’e indexacion di e salarionan di e sector publico, beneficia e sectornan amplio di e poblacion.
E reciente reunion den e oficina di gobierno tabata un paso significativo den e proceso aki, caminda cu a discuti detayadamente e plan y e accionnan pa atende e preocupacionnan treci dilanti. Gobierno ta comprometi pa sigui traha den colaboracion estrecho cu diferente parti interesa pa implementa e medidanan concreto cu ta mehora e bienestar economico di tur ciudadano.
Resumiendo gobierno ta adoptando un enfoke proactivo y colaborativo pa atende e preocupacionnan riba e poder di compra, reconociendo e necesidad di medida specifico y accion coordina pa garantisa cu tur e personanan den sociedad disfruta di un calidad di bida digno y sostenibel.
