Minister di Asuntonan Economico, Geoffrey Wever, a expresa su opinion riba e preocupacion p’e aprobacion di proyecto nobo di hotel riba e isla. Segun e mandatario, e desaroyonan aki nunca mester a autorisa debi na su impactonan negativo den e comunidad y medio ambiente.
Balans entre desaroyo y sostenibilidad
Wever a subraya cu e construccion di proyecto hotelero y turistico grandi no semper ta beneficia e desaroyo general di Aruba. Aunke e proyectonan aki por aporta na un impulso inicial n’e economia, a largo plaso, por general desbalanse y problema cu ta afecta e calidad di bida di e Arubianonan. Fuera di esey, e importacion di trahado di afo pa e proyectonan aki por tin consecuencia riba e mercado laboral local y riba e identidad cultural di e isla.
Compromiso cu un enfoke balansa
E minister tambe a señala cu su gobierno ta comprometi cu un enfoke balansa cu ta prioris tanto p’e desaroyo economico como e sostenibilidad ambiental. Den e sentido aki, el a ilustra e importancia di promove proyecto cu ta respetuoso cu medio ambiente y cu ta contribui n’e bienestar di e comunidad den su conhunto.
Limite n’e crecemento hotelero
Den e contexto aki, Wever a menciona cu e gobierno actual ta comparti e vision cu Aruba a alcansa un punto di saturacion en cuanto proyecto hotelero. Den futuro, e proyectonan cu ta aproba, mester ta sostenibel y aporta n’e beneficionan real na comunidad. Fuera di esey, el a indica cu ta elaborando plan di inversion cu ta inclui e aspectonan di sostenibilidad y desaroyo economico a largo plaso.
Minister Wever: “No ta un secreto con mi ta pensa over di desaroyo di nos pais. M’a bis’e na varios ocasion, den parlamento, den conferencia di prensa, varios biaha. Awe nos tin varios proyecto di hotel nobo den construccion cu den mi concepto nunca mester a wordo aproba. Pero e gobiernonan den pasado a aproba e hotelnan aki y aworaki nos tin cu deal cu e consecuencianan. Consecuencia di RWZI, falta di hende riba mercado laboral, importacion di hende pa bin traha den e sector, algo cu tambe ta hopi cerca di mi curason. Nos como Rubiano, cu nos mester ta keda riba nos luga, nos idioma Papiamento, nos identidad, tur e desaroyonan aki tin impacto, den mi concepto, tambe negativo riba diferente aspecto den nos comunidad.”
E peso cu e tin riba e fondonan di AZV, riba e infrastructura, riba inversion den enseñansa, dus, mi ta completamente di acuerdo cu esunnan cu ta bisa cu nos a yega na un punto cu nos mester realisa cu nos a yega na un “point of no return.” Cu e construccion di proyecto grandi, riba gran escala manera e proyectonan hotelero, proyectonan turistico, no ta mas na beneficio di e desaroyo general di Aruba. Segun mi Minister di Turismo tambe ta para tras di e pensamento aki. Gobierno di Aruba den su totalidad ta para tras di e principio aki. Ami ta bis’e, den tur honestidad, e proyectonan cu ta den construccion nunca mester a wordo aproba, den mi concepto personal. “
Relacion cu Hulanda y financiamento sostenibel
Wever tambe a ilustra e relacion cu Hulanda y e importancia di fondo como esun di Union Europeo pa financia proyecto cu ta acelera e transicion energetico y otro iniciativa duradero. El a duna como ehempel cu e 13 miyon euro cu a obtene p’e proyecto di E-Government y e inauguracion di Maria Convent, ta proyectonan cu ta demostra e capacidad di Aruba pa maneha inversion cu ta beneficia henter e economia.
Compromiso cu e futuro sostenibel di Aruba
Finalmente e minister a reafirma cu e gobierno di Aruba lo sigui traha riba proyecto cu ta balansa e desaroyo economico cu e preservacion di e medio ambiente, sigurando un impacto positivo y sostenibel p’e isla.
