“Papia ta un cos y haci ta otro”, t’un dicho cu nos grandinan ta uza. Ta parce cu nos ta mir’e den practica den ‘politiek-Oranjestad.’ E no ta un secreto cu Minister Glenbert Croes y su directornan no por garantisa suministro di coriente stabiel p’e pueblo. Pero, ken ta critic’e y cuestion’e?
Den prensa y riba Facebook, algun parlamentario di oposicion a sali fuerte y hasta pidi cabes di e minister. A bay te den pasado y record’e riba su mal maneho for di tempo e tabata minister cu su partido OLA, tempo cu MEP no tabata kier a mir’e mes. Otro, ta publica diariamente riba Facebook, cuestionando e baymento di coriente. Mientras tin algun cu den noticiero merdia a priminti cu lo pidi reunion pa yam’e minister den Parlamento di Aruba p’e bin duna cuenta di su maneho.
REALIDAD
Tur esaki tabata promesa y critica di pafo. Riba 23 di mei 2024 a ricibi confirmacion for di Presidente di Parlamento, mr. Edgard Vrolijk cu e no a ricibi ni un solo peticion pa Minister Glenbert Croes bin duna cuenta den sala di parlamento. Durante un combersacion telefonico cu e presidente di e organo mas halto di nos pais el a conta 24ora.com cu: “E ta confirma cu no tin niun peticion.” Cu esaki por confirma cu oposicion ta puro show y mas bien tiger di papel? Pues ta gaña rabia, cu bos duro den prensa y critica riba Facebook henter dia pero den parlamento mes, mirando cu no ta haci uzo di nan derecho y instrumento pa yam’e minister aden p’e bin duna cuenta riba su maneho no efectivo y sin resultado pa cu suministro di coriente?
For di coalicion, esta MEP y RAIZ ta hopi bisto cu nan no ta bay cuestiona nan propio minister, mirando cu nan ta casa cu otro. Pero a spera cu por lo menos esunnan cu no ta casa cu gobierno, pa sali na defensa di nos digno pueblo. Ta parce e ora cu ta website mas grandi di noticia y e noticiero Enfoke so t’esunnan cu ta sali p’e pueblo. Si e plataformanan di Headlines Group cu t’e cas editorial di 24ora.com y TREMPAN no sali na defensa di e pueblo, ken si e ora? Mirando cu e comportacion cu oposicion ta hibando, ta mustra cu nan ta mas bien un show y no ta tuma nan trabou na serio!
