Diabierna durante di un conferencia di prensa extraordinario, Minister-president a informa cu Aruba a bay di acuerdo c’un Rijkswet hibride, den cual ta regla e definicion di e normanan. Y den e Landsverordering Arubaans Financieel Toezicht(LAft) lo regla e normanan financiero, manera e ta awo den LAft.
Prome Minister, mr. Evelyn Wever-Croes, a splica cu por ehempel, den e Rijkswet lo bin un norma pa Aruba mantene su debe bou di control, pero den e ley local lo defini kico esey kiermen. Asina a reparti e aspectonan den e normanan den e Rijkswet y Landsverordering lo hacie un solucion hibride.
CONTENIDO DI RIJSKWET
· Supervision financiero : CAft
· Escalacion
· Posibilidad di PPP bou condicion estricto
· Areglo con ta sali di e Rijkswet (exit bepaling)
Entrega di e Rijkswet na Parlamento lo mester tuma luga prome cu 1 di mei 2025.
KICO ARUBA TA HAYA A CAMBIO
Minister-president a splica tocante e beneficionan pa Aruba. Un di e puntonan principal ta un interes abou riba e fiansa di COVID, cu actualmente ta na 6.9% y lo baha na 5.1%. Asina cu e Rijkswet drenta na vigor, e interes ta baha na 3.4% riba e fiansa di COVID. Esaki lo duna Aruba un espacio financiero di 16 miyon florin.
Otro di e beneficionan ta cu Hulanda lo bay refinancia e debenan externo existente, riba cual Aruba ta pagando 6 pa 7% riba dje. Y e lo baha na 3.4%. Pa mas di 10 aña, Aruba a purba pa yega na e punto aki y awo a logr’e. Esaki ta un parti importante di loke tin riba mesa.
Aruba lo bay cambia su normanan financiero. Esaki lo permiti Aruba pa haci inversion necesario y tambe pa crece socio -economicamente. A acerca IMF pa traha riba e revisionnan aki. Ainda falta algun detaye cu lo caba di fiha den e simannan nos dilanti.
E acuerdo aki ta dentro di e mocionnan tanto di Tweede Kamer pero tambe dentro di e mocion cu Parlamento di Aruba a duna na augustus y september pa sigui negocia. Pero pa tene cuenta cu algun aspecto.
SIGUIENTE PASO
Diabierna Conseho di Minister di Hulanda a aproba e acuerdo y e siguiente paso lo ta pa firma e acuerdo. Despues di a firma e acuerdo, e interes di fiansa di Covid ta baha mesora di 6.9% pa 5.1%. Tambe lo bay trek in e Ley di RAft y lo cuminsa riba e Rijkswet pa presenta na e parlamentonan no mas tarda cu 1 di mei 2025. Den e proceso lo tene cuenta cu e reglanan cu Parlamento a stipula ora mester traha rib’e consenso di Rijkswet pa envolve nan for di comienso.
Despues cu e Rijkswet wordo acepta tanto pa Tweede Kamer y Parlamento di Aruba, e interes riba e Fiansa di Covid ta baha pa e interes cu Hulanda ta presta, cual ta di 0.2% . Actualmente esaki ta na 3.4%.
Tambe Hulanda lo refinancia Aruba su debe externo na un interes tambe di 3.4%
Prome minister a indica Rijkswet ta un ‘Bestuurlijk akkoord’, es decir di gobierno pa gobierno. Tanto Tweede Kamer como Parlamento di Aruba mester aprob’e.
Segun Prome Minister, mr. Evelyn Wever-Croes ta prome biaha cu Aruba ta haya un interes abou pa e debenan existente.
Minister Ursell Arends a para keto riba e presupuesto di 2024, un total di 320 miyon florin ta bay na pago di interes di cual; 63 miyon lo mester a wordo paga na Hulanda di interes. Cu e acuerdo aki lo paga 47 miyon ainda na Hulanda na interes.
Ainda ta keda pa paga 273 miyon florin na interes na debenan bieu. Poblacion di Aruba ta paga casi 3 mil florin na interes di debenan bieu. E debe cu Hulanda ta un debe haci durante pandemia.
Pero dos punto ta importante pa tene cuenta cu ne
1. Sigura cu Aruba nunca mas hinca su curpa den debe
2. Cada besparing ta bay na reparticion husto di fondonan publico na esunnan mas vulnerabel den comunidad.
Aruba tin mas di 25 mil adulto mayor cu mester haya nan ‘fair-share’ di loke Aruba ta produci. Di awo padilanti, cu e besparing, por sinti e progreso den cada skina di Aruba.
Cu e progreso, a laga e adultonan mayor atras y ta nan ta esunnan cu a lanta e fundeshi di nos pais.
“Moral y eticamente di reparticion husto ta bay ta e siguiente paso di Gabinete Wever-Croes,” tabata palabranan final di Minister Ursell Arends.
