Fundacion Cas Marie a pasa pa un bishita na Ministerio di Adulto Mayor awe 23 di mei 2024. Durante e reunion a concretisa prome di juli 2024 como e fecha pa habri e segundo filial di Cas Marie, e biaha aki den districto di Santa Cruz. Asina a yam’e “Cas di Mama Ties” lo forma parti di e proyecto Pasadia como un partner di e Ministerio di Adulto Mayor.
Pasadia ta e nomber di e facilidadnan unda cu adulto mayor lo por bin pasa nan dia y disfruta di un ambiente social y keda activo. Pues for di oranan di mainta te cu final di atardi adultonan di 60+ ta bon bini pa tuma parti den actividadnan, combersa of simplemente relaha.
Proyecto Pasadia lo sirbi manera un gran alivio na nos sistema di cuido atendiendo un grupo grandi riba lista di espera di SABA y den futuro pa adulto mayor cu kier mantene nan mes fisica- y socialmente activo.
Ya caba Ministerio di Ministerio di Adulto Mayor ta trahando di cerca cu instancia di Cas Marie pa asina por a sostene e extension di orario di servicio. Pa medio di e sosten financiero, Cas Marie na Savaneta awor ta operacional cinco dia pa siman y por atende cu mas cliente. Mirando cu e cantidad di persona cu demencia ta creciendo rapidamente aki na Aruba, e fundacion a mira e necesidad pa amplia nan capacidad pa asina nan por cumpli cu e demanda.
Adicionalmente, Cas Marie ta haciendo un tremendo trabou pa yuda conscientisa comunidad riba e señalnan di Alzheimers. Ademas, e fundacion ta yuda apoya mantelzorgers p’asina por sa kico ta spera y con pa adapta na tur fase di e malesa.
Un persona cu Alzheimer no sa cu e tin’e, ni tampoco kier lubida. Nan por lubida detayes, pero nan no ta lubida sentimento.
Minister Ursell Arends a priminti cu lo sigui traha pa trece mas cuido y asistencia pa adultonan mayor, incluyendo esnan cu problema di demencia/alzheimer. “Trahando hunto nos ta logra nos meta y vision,” Minister Arends ta felicita e ekipo di Cas Marie pa tur nan esfuerso.
