Den cuadro di e acontecimentonan di e siman aki, por bisa cu e caso trata den Corte diabierna mainta ta mustra e regularidad cu hendenan ta trece personanan pa drenta Aruba di un forma ilegal. E dos acusadonan tabata Rudolf Irausquin Marin (41) y Lorenzo Diaz (40), ambos naci y biba na Venezuela. E ultimo aki tabata capitan.
E acusacion contra e dosnan aki ta cu riba 30 di december ultimo hunto a trece seis persona di Venezuela of Colombia, sin status legal pa drenta Aruba. A haci esaki pa placa y a pone bida di e hendenan na peligro pa motibo cu e boto no tabatin un sistema di nabegacion, no tabatin iluminacion y tampoco suficiente vest.
Ambos acusado a declara nan mes culpabel. Lorenzo, kende tabata capitan, a splica cu el a wordo acerca pa haci e biahe pa baha e hendenan na Aruba. Bou yoramento el a conta di e situacion dificil na Venezuela y e no tabata sa kico mas pa haci.
Sinembargo e pago e lo a haya ora cu e bolbe. Pero el a wordo deteni na Aruba, prome cu e hendenan por a baha for di e boto. Entre e seis pasaheronan tabatin un hende muhe. Irausquin Marin no mester a paga pa e biahe pasobra el a yuda e capitan durante e biahe pa Aruba, sacando awa cu yena den e boto.
Tristo den e caso aki ta cu aunke Lorenzo tabata capitan, el a haci e biahe sin cu e boto ta cumpli cu e rekisitonan di nabegacion y sin cu nunca el a yega di bini Aruba. Ora cu Hues a puntr’e unda e mester a drenta, su contesta tabata eynan, mustrando cu su dede direccion pazuid di Aruba. Pero un conocemento di e ruta mes pa Aruba e no tabatin. Aparentemente, e tabata guia su mes pa e luznan, resando cu ta Aruba e ta yegando y cu su wowo no a bira.
Durante interogacion di Hues el a bolbe cuminsa yora y pidi pordon ora cu e Magistrado a puntr’e si e ta consciente cu el a pone bida di tur e personanan na peligro, nabegando di e forma ey. Pero Hues a bis’e mesora “ami bo no tin cu pidi pordon. Ami no tabata den e boto. Bo a pidi e otro hendenan pordon,” a puntr’e. Su contesta tabata no.
Irausquin di su banda a bisa cu el a haya e biahe gratis, basta cu e yuda e capitan. E kier a bini Aruba pa traha di forma ilegal. E tabatin duele cu Pasco e no por a regala su yiunan. Pa e motibo aki e kier a bin traha, acumula placa y pa e siguiente Pasco e cumpli cu su yiunan.
El a conta tambe cu e no tabatin un trabou regla ainda, pero si amigonan cu lo por a dun’e un man.
Despues cu a mira e nave riba radar, Kustwacht a bay direccion di e punto y a haya e grupo aki, sin ningun material di nabegacion. Irausquin tabatin un celular den su poder y e señora tabatin un GPS den su tas.
Fiscal a bisa e acusado cu loke el a haci tabata sumamente peligroso. Hopi hende nan bida a core peligro y como capitan e mester tabata por sa miho cu haci un biaha di e forma aki. “Mi por compronde cu e situacion na Venezuela ta malisimo, pero esaki sigur no ta e forma pa soluciona boso problema.”
A tene cuenta cu loke ta e norma di Hof y a yega na e conclusion, mirando cu ta prome biaha, un castigo di 18 luna pa cada un.
Abogado mr. Canwood cu a representa nan a splica cu no tin problema pasobra su clientenan a acepta e hecho. Abordo tabatin hende cu conocemento di nabegacion y sa kico mester pa haci un biahe sigur. A declara cu conscientemente nan a scoge pa haci e biahe di e forma aki. Pues nan tabata consciente di e peligro.
Di otro banda e ta haya e castigo hopi halto. A mustra riba casonan di personanan cu a wordo deteni y a deporta nan cu un dagvaarding sin cu a sinta nan castigo mes. Mas ainda. Tin caso di un capitan cu a yega di haci un biahe unda un hende a perde su bida.
Asina mes, el a haya un castigo y despues a bolbe atrap’e na mei ultimo. Pa colmo, e mes a declara cu na december tambe el a haci un biahe. Y tin diferente hende a laga nan bay prome cu a yega dilanti mesa berde.
Hues a dicidi di pensa un rato y despues a dicta sentencia mesora. El a bisa cu berdad e tin dato cu a detene hende atrobe na mei, pero e no tin dato disponibel pa demostra cu loke e abogado a trece dilanti ta berdad.
El a haya proba traficacion di hende. E acto cu nan a comete ta bay en contra di loke ta e maneho di Gobierno, pa combati ilegalidad.
Mirando e peligro cu a pone e hendenan den dje y teniendo cuenta cu loke ta e maneho di Hof, a dicidi di bay di acuerdo cu loke fiscal a pidi, esta 18 luna.
E duo a keda di bay pensa si nan ta apela of no.
