Diahuebs atardi, despues di 5:45 pm, polis a presenta na Sero Patrishi p’un caso di agresion. Aki un homber a yega den su auto, un Chevrolet Spark blanco number A-74503, cu e intencion pa regla cuenta cu e muchanan di Sero Patrishi.
Na momento cu el a baha, cos a bay fo’i man. Aki cuater hoben di e bario a agredi’e. Polis a presenta na sitio pa asina papia cu tur esunnan cu por a mira algo. Tambe a pidi presencia di ambulance, pasobra e homber a haya golpi na cabes.
E paramediconan cu a presenta di biaha a controla e homber, unda cu a stabilis’e. Despues cu nan a logra stabilis’e, a transport’e pa hospital p’e ricibi tratamento avansa.
