A dura Ministerio Publico no menos cu cuater aña y despues di a hiba nan diferente biaha dilanti hues, pa awo porfin a saca un citacion (dagvaarding) den e caso Flamingo, den cual e politico Otmar Oduber ta e sospechoso principal. Tin un lista di riba dies sospechoso cu lo bin dilanti den e caso aki, aunke cu ta nota cu ta cerando acuerdo cu algun prome cu e caso yega dilanti hues. E fecha exacto no ta conoci ainda, pero Otmar Oduber a confirma cu Ministerio Publico a inform’e cu nan tin su citacion cla, aunke e no a hay’e den su man ainda.
Esaki a bini despues cu ayera Otmar Oduber a tene un conferencia di prensa na su cas y a anuncia di lo cuminsa un caso penal contra varios polis y Ministerio Publico mes, pa e forma con nan a atende cu su caso. E no por sigui warda, despues di cuater aña largo cu a kibra su famia fo’i otro, kibra su negoshi, pone banco cera su cuentanan y caba cu su carera politico, cu ainda fiscal no tin fin di presenta kico ta e acusacionnan concreto cu nan tin contra dje. E sa cu na un principio a menciona un cantidad di acusacion pisa contra dje y ultimo a minimalisa e acusacionnan den algun delito cu e ta considera “sin sentido”. Un di nan ta, cu por ehempel e lo tabatin empleado riba payroll cu nunca a traha p’e. Ironia di bida ta cu recherche ta investig’e pa esey, siendo cu ta coordinador di Minister Presidente Evelyn Wever-Croes, cu el a haci un fabor pa tum’e bou di su ministerio.
“Pero por lo menos awo nos lo wak kico nan tin contra mi. Awo mi por defende mi mes. Pa cuater aña mi mester a sinta man crusa y wanta acusacion, insulto y un castigo adelanta inhusto pa mi y mi famia”, asina Otmar Oduber a duna di conoce. Su ekipo di defensa ta pendiente pa e citacion pa asina por cuminsa cu e proceso di defensa den forma oficial. E ta sigur di su inocencia y lo haci tur lo posibel pa purba demostra y convence corte cu e no tin nada di haber cu nada di locual ta acus’e di dje. E mes ta haya un hilaridad cu a cuminsa papia di otorgamento di tereno y na final awo kier acus’e di a tuma empleadonan na trabou pa fabor politico. Pues, di henter e acusacion di lo a otorga tereno comercial na supuesto amigonan of supuestamente a cambio di pago of fabor, nan no a bin cu nada mas.
Otmar Oduber ta lamenta cu, mas bien e ta sinti cu, awor fiscal ta druk bezig cu un “fishing expedition” pa mira kico por pega toch den corte pa husticia no perde cara. Pero e ta sigura nan cu lo no ta un caso facil pasobra e lo bay “all out” pa cuida su imagen, su bon nomber y pa garantisa su futuro den politica. “Ruman, ta esaki mi por haci bon, esaki ta mi pasion. Ta cu esaki mi ta cria mi yiunan”, e politico a contesta cu un bos sigur di su mes.
Aunke cu pa otro e noticia cu lo persiguie por ta zona tristo, p’e e accion aki ta mas alentador. “Esaki ta loke mi tabata kier, esaki mi tabata warda”, el a confirma na nos. E ta cla pa defende su mes y demostra na henter pueblo di Aruba cu a para bira awo cu ken cu ta, scondi tras di “testigo priva y sin nomber” por hiba redo sin base na polis y nan ta traha un proces-verbaal mesora pa Procuador General ordena un investigacion contra bo. Ta asina facil a para bira awo pa bo susha nomber di un politico y purba caba cu su carera na cumbiniencia di e opositornan. Un cos el a corda tur esunnan cu tin placer cu tipo di weganan asina, cu “awe ta mi y mañan lo ta abo. Na final ta Hulanda lo dicidi y uza husticia pa influencia politiek Oranjestad”.
