Den un discurso emocional y desafiante dilanti hues, e parlamentario y ex-Minister di Infrastructura, Benny Sevinger, a defende su mes energicamente di e acusacionnan cu a persiguie durante mas di shete aña. Den su declaracionnan final, Sevinger a remarca riba e acusacionnan di corupcion y a destaca e contexto politico y economico cu a desaroya den su maneho durante su trayecto como minister.
Un contexto di acusacion y persecucion
“Respetabel huesnan, miembronan di Ministerio Publico. Awe mi ta dilanti boso pa pronuncia mi ultimo palabranan den mi defensa.” Cu e palabranan aki, Sevinger a cuminsa cu su discurso, señalando e persecucion constante y e acusacionnan falso cu e y su famia a enfrenta a lo largo di e añanan. El a denuncia cu durante su trabou como representante di pueblo, e tabata obheto di insulto constante di parti di e Prome Minister, kende no ta laga ningun oportunidad pasa pa desacredit’e publicamente.
Difusion di informacion y acusacion publico
Sevinger a remarca con, den e ultimo cinco añanan, a comparti documento di e investigacion di Ministerio Publico publicamente tanto den parlamento como den medionan di comunicacion, contribuyendo na un campaña di difamacion den su contra. Hasta a acusa e fiscalnan di participa den e “sfeermakerij” aki, esta den creacion di un ambiente negativo.
Un citacion impactante
Den un momento crucial di su discurso, Sevinger a cita directamente n’e fiscal: “Voor mij is Sevinger de baas van een grote Criminele Organisatie. Zelfs als wij klaar zijn met zijn verhoor moet hij in de gevangenis blijven tot zijn rechtszaak voorkomt.” E declaracion aki, segun Sevinger, ta mustra claramente e intencion di e fiscal di incrimin’e den tur manera, seleccionand’e prome y despues buscando delito pa hustifica su persecucion.
Situacion di Aruba na aña 2009
Prome cu atende den detaye e rasonnan di su audiencia na corte, Sevinger a contextua e situacion di Aruba na aña 2009, ora cu el a asumi su funcion memey di un crisis financiero y economico mundial. El a describi un pais cu perdida di poder adkisitivo, desempleo, problema social y fondo di pensioen y seguro di salud practicamente den kiebra. N’e retonan aki, su gobierno a inverti den mehoracion di infrastructura di e pais.
Maneho di infrastructura y asignacion di tereno
Sevinger a detaya un cantidad di proyecto di infrastructura cu el a encabesa, incluyendo e construccion di caretera manera Watty Vos Boulevard y Green Corridor, renobacion di hospital, scol y vivienda social y e reubicacion di e terminal di carga di Oranjestad. El a subraya cu su maneho di asignacion di tereno a basa riba e igualdad di trato pa tur cu a pidi, independendientemente di nan afiliacion politico.
A trata tur hende mescos
“Aan de Directeur DIP: Dezerzijds akkoord, Dezerzijds geen bezwaar … “gaarne uw medewerking”. Kisas e opositornan politico no tabata contento cu e maneho aki. Kisas fiscal na Ministerio Publico no ta di acuerdo cu e maneho aki. “Pero respetabel huesnan, esaki tabata e maneho!” Na momento cu Benny Sevinger tabata minister, hasta ex-Prome Minister Nel Oduber y su yiunan a haya tereno firma door di dje. Pa demostra cu e no ta diferencia si ta hende di MEP of AVP, tur peticion cu a yega cerca dje a sali cu e mesun texto direccion DIP.
Impacto personal y sosten familiar
Den un nota personal, Sevinger a describi e impacto cu e acusacionnan tabatin den su bida y esun di su famia. El a gradici e sosten incondicional di su casa, su yiunan, mama, ruman y amigonan, kendenan a keda banda di dje durante tur e añanan dificil aki.
Influencia politico y Ministerio Publico
Sevinger a argumenta cu e acusacionnan den su contra tin un motivacion politico, cu adversario uzando e sistema hudicial pa desacredit’e. El a relata con, durante e campaña electoral di aña 2017, a presenta e denuncianan den su contra pa motibo politico y con cierto parlamentario a influencia den Ministerio Publico pa nan cuminsa cu un investigacion contra dje.
Conclusion: Un yamada na husticia
“Respetabel huesnan, mi no t’aki pasobra mi ta Benny Sevinger, sino pasobra mi opositornan politico y Ministerio Publico ta considera cu mi maneho como Minister Sevinger, a viola ley.”
Den su palabranan final, Sevinger a expresa su speransa cu e huesnan, actuando di manera neutral y obhetivo, mira e berdad y limpia su nomber. El a conclui su discurso pidiendo Dios p’e otorga nan sabiduria den tumamento di decision y pa pone un fin na e experiencia amargo aki p’e y su famia.
