Tur cos ta mustra cu Minister di Energia, Glenber Croes lo cumpli cu su promesa di duna cuenta na pueblo riba e problema den ELMAR. Manera ta conoci, siman pasa durante un conferencia di prensa di gobierno, e minister a indica cu profesionalnan di Merca, di e compania MPR lo bin Aruba pa haci un investigacion riba e problema real den ELMAR.
Ya e siman a pasa y 24ora.com a bay busca e minister na su salida despues di un ‘lunch meeting’ den zona hotelero p’e duna cuenta riba su promesa. Di un forma exclusivo, e minister a sigura Leo Geerman di 24ora.com cu awe tardi e lo ricibi e resultado di e investigacion y djey lo comparti’e cu pueblo.
![](https://24ora.com/wp-content/uploads/2024/05/Sequence-02.11_24_03_15.Still070.jpg)
Despues di ricibi e resultado preliminar, lo sigui e proceso di solucion. E minister, ta mas interesa den e solucion, claro, lo inform’e kico t’e problema pero e kier mira solucion mas pronto posibel. For di e tono di e minister, ta sinti cu el a cuminsa sinti e presion di pueblo cual lo transmiti automaticamente den su votonan den proximo eleccion.
“Tin fondo pa soluciona e problema”, asina Minister Glenbert Croes a comenta pa cu e situacion di coriente riba nos isla. Croes a confirma cu e mes ta rabia y su gobierno tambe ta rabia cu e situacion di coriente actual riba nos isla, pa cual, ta uno no stabiel y pueblo ta hostina cu tur dia coriente ta bay sea na cas, trabou of ora bay come afo den restaurant.
Croes ta spera cu e confiansa cu e ta brinda n’e ehecutivonan local, nan tuma e peso riba nan schouder y soluciona e problema. Ora ta trata di aparatonan di e pueblo kende ta daña debi na coriente cu ta bay, e minister a confirma cu e trahando riba un plan pa recompensa e pueblo di un miho manera y no 25 florin of 50 florin manera ta e caso actualmente.