Minister di Husticia y Asuntonan Social, Rocco Tjon a bay parlamento diahuebs merdia riba su propio peticion mirando tur informacion circulando tocante e famoso helicopter. Dialuna pasa, gobierno a tene un conferencia di prensa pa aclaria esaki y mesora puntra presidente di parlamento pa bini y brinda un splicacion durante un reunion cu porta cera.
Ta asina cu e dossier aki tin tres parti segun e mandatario. E prome parti ta relaciona ful e proceso for di inicio pa yega na un helicopter. E minister a brinda 13 documento den tur transparencia pa por mustra con a encamina e proceso. E segundo fase tabata na fin di 2021 y comienso di 2022, pasobra na e momento ey caba e minister ta bisa cu tabata tin cierto informacion ta circula. “Y segun e contrato, nos a puntra e compania na e momento ey pa prueba cu nan ta in ‘Good Standing’ pasobra esey ta un di e rekesitonan den e contrato. Y nos a ricibi tur e documentacion en cuestion for di nan e momento ey, den cual tambe a mustra e persona referi den prensa cu lo a entrega su mes, no ta forma parti di e compania. Nunca tabata doño, y no ta accionista.”
