Pa acusado Pieter Susebeek ta increibel tur loke cu el a tende argumentonan di Ministerio Publico desde cu caso Avestruz a cuminsa. Tur ta basa riba engaño y simplemente pasobra “mi ta amigo di Benny nan a condena mi”. Tabata algun di e palabranan cu el a expresa diaranson den corte.
E dia ey hof a finalisa cu tratamento di e caso Avestruz (soborno di un mandatario y tereno publico haya pa inverti pero nan mes no a inverti den dje). Esaki ta core rond di e periodo di 2013 pa 2017 tempo cu Benny Sevinger tabata minister.
OM a bay den apelacion contra tres sentencia: Benny Sevinger, Pieter Susebeek y Leoncita Arends, pasobra e ta haya cu e castigo ta tiki y den un di acusacionnan di Benny Sevinger e no tabata di acuerdo cu e “vrijspraak”.
Tabatin cuater acusado cu no tabata di acuerdo cu nan sentencia y a bay den apelacion pidiendo pa “vrijspraak”l Ta trata aki di: Curt Harms, Ninosca Nuñez, Gaby Werleman y Carlo Mansur.
Den ultimo palabra Susebeek a saca tur su emocionnan wanta y a pidi e huesnan pa tin sabiduria pa yega na un decision husto den su caso. Esta “vrijspraak” pasobra niun momento el a soborna su amigo Benny Sevinger, kende tabata Minister di Instractura e tempo ey.
Susebeek ta yiu di un persona kende pa 25 aña largo tabata griffier di corte. “P’esey a lanta nos cu e pensamento cu ley ta importante y cu mester trata tur hende di un forma husto. Y asina semper mi a purba di biba mi bida.”
Sinembargo, e no por sin bisa cu caso penal Avestruz a atacha e confiansa cu e tin den ley y husticia. “Mi a realisa cu un fiscal y un hues ta keda hende. Y nan tambe por comete fout.”
Pero mas cu tur cos, segun su expresion den corte, el a keda babuca cu fiscal a yam’e pa gañado, mientras cu su abogado den e defensa a mustra bon cla con ministerio publico a manipula e berdad.
Den e sentencia di prome instancia tabatin un cantidad di cosnan cu no ta cuadra. A menciona por ehempel un factura cu ta riba nomber di Benny Sevinger, siendo cu esey no ta e caso. E no por kere cu fiscal u hues no ta realisa cu e pagonan haci tin depositanan realisa riba cuenta di Pats. Pues cu ta mustra cu tin pago haci.
“A condena mi pasobra mi ta un amigo di Benny. Mi ta orguyoso cu e ta mi amigo. Tur hende cu conoce Benny, sa cu e ta haci tur cos pa Aruba y e hendenan di e isla aki, sin haci diferencia.” Pero, el a agrega, semper tin hendenan jaloers, principalmente e contrincantenan politico. Y nan ta esunnan cu a entrega keho. Apesar cu e informacion duna ta contene un cantidad di mentira, OM a sigui cu e caso, a ricibi bishita mas cu un biaha di e dos politiconan y hasta a wordo ofreci pa pone mas placa pa acelera e investigacion.
El a insisti cu Benny Sevinger no a faborece, no a cumpre y “nos ta simplemente amigo. Y pa e amistad ey tanto e como ami a wordo castiga. Esey ta straño pasobra amistad ta loke a haci di Aruba “one happy island”. Y a agrega “Dios gracia mi tin un amigo manera Benny y mi lo sigui bisa esey, pasobra un otro manera e, no tin.”
Den e caso di e terenonan, a bisa cu ta e propio funcionario di DIP, Tsu, a presenta e peticion di Pats Development cu for di 2006 caba a haci un peticion. Y tambe a inclui den e conseho cu “si no cumpli cu e condicionnan di opcion, e opcion aki lo wordo hala aden”.
El a trece dilanti cu den media a menciona ampliamente cu su persona a ricibi 11 tereno. “Esaki no ta berdad.” Y a splica cu tres di su companianan a haya tereno: Pats Development, BPD Development y Berkem. E otro compania cu ta menciona, esta Nusadua, no ta pertenece na dje, Mahogany nunca a bira algoy White Fin ta proyecto di un otro compania cu el a tuma over. “Tres proyecto den ocho aña. Esey no ta nada straño.” Y a mustra riba declaracion di e propio funcionario di DIP (Tsu), kende a bisa cu no ta controla si un hende tin otro tereno erfpacht caba, ora ta trata di tereno comercial. Pa tereno residencial e ta otro, y ta otorga solamente un tereno.
E peticionnan cu Susebeek a haci, segun el a splica hues, tin cu ta di hopi tempo prome cu Sevinger a bira minister. Di otro banda, e parcelanan riba cual el a haci peticion, tabata disponibel pa hopi aña caba. Esun di Pats pa mas cu 15 aña, di BPD mas cu 40 aña, White Fin mas cu 40 aña. Cualkier persona por a desaroya esaki, si nan tabata interesa. “Mi tabata e prome y e unico cu a haci un peticion pa e terenonan ey.
Ademas, durante e peticionnan cu el a haci, ni un biaha a pasa un proceso acelera. Ni un biaha a perhudica un persona, pasobra nan lo tabata kier e mesun tereno. “Con Ministerio Publico por bsia e ora cu mi a wordo previlegia?”
Y pa finalisa el a bisa “e unico cos cu mi a haci ta uza e derecho como inversionista y desaroyado pa entrega un peticion. Y den e peticionnan cu a acorda, a haci esaki sin haci diferencia.. Pa esaki mi no merece un castigo,” el a finalisa bisando den su ultimo palabra den corte.
