Diaranson anochi a tuma luga e lansamento di e cancion di mas nobo di ‘NFuzion titula ‘De Que Me Vale’.
E cancion aki ta canta pa Aimee Middendorp y p’e e ta un experiencia unico, diferente y special. E ta gradicido na Nfuzion p’e oportunidad.
Door cu e videoclip ta hopi revelador, pa cual Aimee a bisa cu pa haci algo asina, bo mester ta hopi prepara, mentalmente. Tabata un poco duro, pero e tabata un gran reto. Y el a disfruta haciendo e videoclip.
Titulo di e cancion ta “Que Me Vale”, cual ta un vallenato. Y ‘NFuzion ta un banda cu a nace cu e acordeon, pa cual den e cancion aki a incorpor’e den dje. Y Danny Koolman a haci su magia na momento di skirbi y aregla e cancion aki.
E cancion ta trata di un hende muhe, unda cu e homber a trat’e como sifuera cu e no ta bal nada. Y eventualmente, e muhe a para ariba su pianan y a evoluciona. Ta algo cu hopi hende por wak nan mes den dje.
E muhe a bay dilanti y a demostra cu e no tabatin mester di e homber mas.
Por ultimo, Aimee a bisa cu el a ripara cu tin varios banda na Aruba ta sacando temanan nobo y esey ta algo positivo. E ta bon pa nos cuminsa acepta loke ta di nos prome, den sentido di apoya nos mesun hendenan, nos mesun artistanan local.
Ban duna mas balor na tur artista- y bandanan local, cu ta dedica hopi tempo y dedicacion na bin cu produccionnan nobo. Y nan ta hacie cu amor pa e pueblo di Aruba.
E banda local, ‘NFuzion despues di basta tempo ta lansa un cancion nobo riba mercado.
Ofo Escudero di ‘NFuzion a señala cu e cancion aki lo mester a sali na 2020, pero pa motibonan ya conoci, na nivel mundial, esaki no a logra.
Despues di esey, cada biaha tabatin un of otro obstaculo ta aparece na momento di e lansamento. Na final di cuenta, a bin hopi otro ideanan dilanti. A pensa riba e mastering, tabata kier un zonido peculiar riba dje. Y na final a traha cu e persona cu ta traha cu Sebastian Yatras, cual tambe a haci cu e proceso a dura mucho mas.
Pa tur local e banda a pasa aden cu e cancion aki, nan a dicidi na lansa e cancion na un manera ful diferente di locual nan ta custumbra cu ne.
Mas aleu, Ofo a bisa cu pa e aña aki nan lo bin cu mas produccion y mirando cu ya caba Carnaval 70 ta den porta, nan produccionnan lo ta enfoca riba e temporada aki.
Pero ya caba nan tin nan planning traha pa 2024 y despues di Carnaval nan lo tin mas produccion cu nan lo lansa cu e mesun atencion cu cual nan a dedica na ‘Que Me Vale’.
