Diahuebs mainta Minister di Turismo y Salud Publico Dangui Oduber a presencia e comienso di e curso di “Product Development” organisa pa Aruba Tourism Authority (ATA) y APA.
E workshop aki tin un duracion di 2 dia y ta crea specialmente pa “tour operators” (TO).
Segun e mandatario, den e workshop aki e TO lo haya diferente informacion importante, conocemento y habilidad pa sobresali den nan trabou. Nan ta e embahadornan di Aruba den turismo.
Den e 2 dia di entrenamento e TO lo haya sa mas di aspecto di servicio, nan lo conoce di cerca e maneho y vision di Ministerio di Turismo. Tambe nan lo haya sa di tur e proyectonan cu ta den ehecucion. Nan lo haya un bista di tur e inversionnan haci pa Ministerio di Turismo, APA y ATA. Inversionnan den cuadro di mehoracion di producto Aruba.
Minister Oduber a splica cu su maneho ta basa na busca e turistanan afluente, keda haci inversionnan continuo den e producto Aruba y den diversificacion di nos turismo.
E mandatario ta aplaudi y ta haya e tipo di cursonan aki hopi importante. Pa di e manera aki por comparti cu tur e TO-nan cu ta ofrece un servicio na nos turistanan. P’asina nan conoce mas di cerca kico tur ta e proyectonan y inversionnan cu ta haci.
Finalmente Minister Oduber a gradici ATA y APA pa organisa e workshop di “Product Development”. Esaki sigur lo duna un balor agrega na e servicio cu e TO nan ta brinda na nos bishitantenan.
