Mainta den area di Noord, na altura di Kamay, un homber tabata agredi pa algun persona na momento cu e tabata cana cu su cacho. El a yama polis pa interveni den e situacion aki.
Brian Falconi, kende ta e persona agredi, a indica cu e tabata cana cu su cacho y aki tabata unda un persona a baha fo’i scooter. E persona aki a puntr’e si Falconi tabata buscando problema, si ta wanta e kier. E persona aki a bira dal Falconi un scop den su bariga, subi scooter y sigui su caminda.
Falconi a sigui su cana y no a duna importancia n’e incidente. Pero den area di Kamay e persona a regresa den un auto. Aki a tir’e cu piedra y dal su man. Segun Falconi, e persona a acus’e di a drenta su cas den ora di mainta y horta boter di whisky. Tambe a bis’e cu nan tinie graba di a haci esey.
El a bisa nan cu e lo yama polis p’e si no move pero a bis’e cu e mes lo termina deteni pa ta ladron. E persona a subi su auto y move fo’i e sitio, pero a regresa pa bolbe agradie.
E biaha aki si Falconi a yama polis p’e persona. Esun cu a agredi Falconi ta un conoci di su persona. El a splica cu e no tin problema cu nan, pero nan a tild’e di ladronicia y cos a escala. A bis’e pa no yega cerca nan mas y Falconi a bay di acuerdo. Awo e tabata cana trankil riba caya cu su cacho, pero nan mes a acerc’e pa busca problema.
Di otro banda e persona masculino ta acusa Falconi di horta y cu e tin prueba. Esun ta acusa Falconi di tin problema cu su yiu, di a manda auto riba e yiu, manda cacho, di a horta e alcohol y despues a regresa esaki. Falconi a hasta puntr’e si nan tin e graba di a haci algo asina, di cual e otro partido a indica cu mas hende a mira kico tur a sosode.
Mientras cu polis a yega n’e sitio, e persona cu a acusa Falconi a dicidi di bandona sitio. Falconi ta para ariba cu e no a haci nada, no a menasa hende ni busca problema. El a resulta herida door di e piedra ricibi y scop. Polis a conseh’e pa bay recherche y entrega keho di loke a sosode.
