Colegio EPI ta den su aña di celebracion den cuadro di e di cinco lustro di e scol. Ki manera mas bunita pa sigui cu e celebracion organisando un eleccion di reina. Pa e materia di Bewegingsonderwijs (BO), e studiantenan tin como tarea pa organisa e eleccion di reina, como meta pa recauda fondo pa un studie reis pa New York cu lo tuma luga den luna di februari. E ta mas bien pa siña mas riba e tereno di ‘Organisatie en Leiding.’
E eleccion di reina di Colegio EPI, organisa pa e studiantenan di BO-Groep lo tuma luga riba diasabra 14 di januari 2023 den Entertainment Center. Porta lo habri pa 6:30 pm y show ta ranca sali pa 7:00 pm. Desde diahuebs awo, 5 di januari 2023 por cumpra ticket cerca Bo candidata preferi of na CITGO Boulevard y Esso Ville.
E candidatanan ta entusiasma pa dia di eleccion. Nan trahe lo ta uno di material recicla. E eleccion ta conta e biaha aki cu dos categoria: Studiante y Docente.
Candidata:
Pa categoria di studiante;
Jennely Winklaar, Ariadna Harewood, Heily Giel y Judienne Celaire.
Pa categoria di docente;
Rosmery Rondón cu lo representa unit Economia y Geraldine Shera Albertsz cu lo representa unit Salubridad y Servicio.
E invitacion ta n’e pueblo pa sostene nos candidatanan y cumpra Bo ticket n’e puntonan di benta menciona mirando un gran show cu lo tin otro siman diasabra.
