Hopi di nos tin bibo den nos memoria, e dia cu nos tabata spera yen di entusiasmo y orguyo e 5 landadonan di Aruba Dolphins pisa suela di Aruba despues di a sali mainta trempan di Venezuela. E fecha 11 di november 2018 lo keda marca den historia di no solamente deporte si no tambe di evento caritativo, recaudando un bunita suma pa Koningin Wilhelmina Fonds (KWF).
Un suma cu a keda crece y crece ainda despues di e fecha di e gran hazaña. E 5 landadonan a drenta e awa di Venezuela cu un solo meta, cual cu hopi empeño di parti e landadonan y cu sosten di organisado, sponsornan y publico en general a logra e meta aki.
E landadonan a sali cu velocidad halto fo’i Venezuela pero yegando Aruba e stroom tabata masha duro mes. Cu ayudo di esnan cu a guia nan, sea den boto, kayak of den awa, nan tur 5 a yega Aruba den bon estado di salud. E lunanan largo di entrenamento bou guia di coach Roly Bisslik tabatin su fruto.
- Davy Bisslik a yega Santo Largo pero a dicidi di landa bin Zeerovers y logra yega despues di un landa di 8:20 ora (36.06 km).
- Stephan Thijsen a subi tera na Barcadera despues di un landa di 8:41 ora (37.37 km).
- Sigui pa Romar Arendsz cu tambe a subi tera na Barcadera y a landa 8:47 ora (40.92 km).
- E prome dama cu a landa di Venezuela pa Aruba, Wendy Kock, cu a impresiona publico presente a subi tera na Surfside Marina y a landa net 10 ora (43 km).
- Deaxo Croes tambe a yega Aruba na Barcadera y a landa 10:20 ora (42.42 km).
Ta un dia cu lo keda marca den curason di tur cu a biba e hazaña aki.
