Den e último simannan outomobilistanan ku ta frekuentá den área di brùg por a tuma nota ku tin kambionan positivo tumando lugá gradualmente den e habitat natural. Ta trata di trabounan di limpiesa i mantenshon ku e kompania Bio Cleaning a bin ta hasi ku koperashon di Ofisina di Turismo di Kòrsou (CTB), Ministerio di Tráfiko, Transporte i Planifikashon Urbano i Openbare Werken (OW). Durante di e trabounan aki ta kap palu, kita yerba shimaron, piki kantidat grandi di shushi i snui palunan típiko di Kòrsou, manteniendo e identidat natural di e vegetashon lokal.
A kuminsá ku e área nord-ost bou di brúg algun siman pasá i djabièrnè último a finalisá e área suit-ost bou di brúg. Bio Cleaning lo sigui limpia mas área den e próksimo simannan i hasi e trabounan di mantenshon di e áreanan ku ya a limpia. Alabes, nan lo kontinuá ku un proyekto pa iluminá brùg pa temporada di fin di aña. Bio Cleaning ta supliká pueblo di Kòrsou pa yuda tene e áreanan aki limpi i pa no tira shushi den e áreanan natural na momentu ku ta baha òf subi brùg.
Awendia hopi turista ta skohe konsientemente pa bishitá paisnan kaminda e nivel di limpiesa ta haltu i kaminda ta konservá naturalesa i medio ambiente brindando e kuido nesesario na vegetashon lokal. Investigashon ta mustra ku un di e promé áreanan ku turistanan ku ta bini Kòrsou ku barku krusero ta bishitá ta brùg Juliana. Teniendo kuenta ku e aspekto aki, Bio Cleaning a inisiá e proyekto pa limpia i hasi mantenshon na nivel profeshonal di e áreanan alrededor di brùg. Esaki ku e meta pa duna un granito chikí pero importante na desaroyo di Kòrsou su turismo i ekonomia.
Durante di trabounan di limpiesa di e áreanan bou di brùg, kual a tuma lugá atrobe despues di 20 aña, a topa un situashon alarmante di shushedat. Na tur a saka mas ku dos mil bòter di plèstik, bleki di bebida, diferente piesa di outo, pasport i otro dokumentonan di identifikashon, prenda di fantasia, tayer, zim di dak, disfrasnan karnavalesko i asta ‘microwave’ for di den e dos áreanan menshoná. Ta importante pa tene na kuenta ku ta e bista aki turistanan ku bin Kòrsou tin na momentu ku nan ta subi i baha brùg Juliana pa saka potrèt. Awor ku a limpia, tantu pueblo di Kòrsou komo turistanan tin un bista mas bunita i por saka potrèt di palunan lokal manera palu di wabi, kenepa, tamarein, apeldam, wayaká i indju.
Bio Cleaning ta limpiando i lo sigui ku e mantenshon di e áreanan ku a limpia pa un temporada mas. Sinembargo, ta importante pa siudadanonan mes tambe yuda mantené e áreanan limpi. Bio Cleaning ta hasi un súplika na outomobilistanan pa no zuai shushi tira for di brúg ni tampoko dùmp shushi konsientemente den e áreanan aki. Pa dùmpmentu di shushi por bishitá Malpais-Selikor. Tambe ta supliká personanan ku ta transportá shushi via brùg pa paketá esakinan di tal forma ku nan no ta bula bai ora ku e trùk òf pikùp ta pasa riba brùg. Komo yunan di tera ta hopi importante pa nos mes kuida i balorá nos pais.
Bio Cleaning
Bio Cleaning tin komo meta pa ser proaktivo den limpiesa di pais Kòrsou ku enfoke riba kuido di e naturalesa i vegetashon lokal, konservando su identidat natural, kual ta algu úniko riba nivel mundial. E vishon tras di e meta aki ta pa un aña rib’un dia Kòrsou kompletu siña balorá i kuida nos medio ambiente, nos naturalesa i nos propio vegetashon. Tambe pa turistanan ku bishitá nos isla mira Kòrsou komo un pais limpi, bunita i ku un medio ambiente bon kuidá. Pa kualke pregunta tokante Bio Cleaning su servisionan por yama na number di telefòn 511-2022.
