Gabinete Pisas II mester splica Parlamento, ta dicon lo elimina e rebaho riba e condicionnan laboral di e Minister y miembronan di Parlamento prome cu tur hende. Fraccion di PAR a para keto na e rapport di Hunta di Conseho (Raad van Advies, RvA) cu a indica cu gobierno mester splica con gobierno tin idea di bay ehecuta e plan aki otro aña.
Manera e hunta ta mustra, Gabinete Pisas II ta indica den e Presupuesto Supletorio 2022 di tin e intencion di elimina e reduccion riba e pakete total di condicionnan laboral di e Minister y miembronan di Parlamento por completo entrante prome di juli 2023.
Pa e ambtenaarnan y esunnan di mesun rango e supresion total lo ta entrante prome di januari 2024. Pero e hunta ta preocupa cu e plannan aki di gobierno y a pidi gobierno pa splica con ta bay haci esaki, teniendo na cuenta cu e situacion financiero di pais.
Gabinete Pisas II a dicidi pa no continua cu e intencion original di elimina e reduccion dje 12,5% y ta enfatisa cu no tin e intencion di sigui cu esaki pa e aña aki mas tampoco. Sinembargo, gobierno a duna tur funcionario y persona di mesun rango un pago un biaha so di 1750 florin bruto riba nan salario.
Pa loke ta trata e post ‘Subsidio y transferensianan’ e intencion ta pa sigui cu un subida puntual dje subsidio di 6% pa tur e instancianan subsidia pa gobierno. “Esaki ta un compensacion di un biaha so, debi na e aumento di costo di bida.”
No obstante, RvA a conseha gobierno pa supervisa di acerca e adaptabilidat di e consecuencianan financiero dje eliminacion gradual den e presupuestonan aki. Si ta necesario continua cu eliminacion adicional te ora cu tin circunstancia financiero mas faborabel. Riba e conseho di RvA aki, gobierno a reacciona splicando cu e eliminacion dje descuento salarial di 12,5% ta solamente posibel for di aña 2023.
“Lo implementa e eliminacion (pa 2023 y mas despues) den transhi, teniendo na cuenta cu e realidadnan financiero di pais. Lo evalua e posicion di likides di pais tur aña y lo evalua a base di esaki, si ta existi margen tanto presupuestario como tecnico, di likides pa draai bek (parcialmente) e actual reduccionnan den e condicionnan labora.
Cu otro palabra, e eliminacion gradual ta depende y lo tuma luga, denter di e medionan financiero di pais.”Asina gobierno ta enfatisa den su splicacion dje Presupuesto Supletorio 2022.
Parlamento a trata e presupuesto aki diaranson ultimo den Comision Central. Durante e reunion aki, Parlamentario Steven Martina di MAN tabata kier sa principalmente, dicon ta papia di un aumento di 19 miyon florin. Importante ta tambe, segun Martina, cu no ta nada straño cu pa cera e presupuesto 2022 di forma balansa lo haci uzo di sosten di likides.
Segun Martina, prome gobierno a haci comosifuera cu lo no haci uzo di sosten di likides for di Hulanda pa cera presupuesto di forma balansa, pero a resulta awor cu ta esey ta e realidad.
Na final dje reunion Presidente di Parlamento di Charetti America-Francisca a constata cu Parlamento a bay di acuerdo pa saca un informe cu e preguntanan cu e parlamentarionan a haci durante di e reunion, pa gobierno por contesta por escrito.
